葉朗程

葉朗程

一個自稱「IFC 張智霖」的 private banker,一個又一個浪漫與惡俗的中環故事。 www.facebook.com/marcusyiphk

2021/1/6 - 12:59

唔係喎,你睇吓林海峰

作者 FB

作者 FB

做一百天的偶像需要運氣,做一萬天的偶像也需要運氣,還需要更多。

林海峰頒獎給姜濤,是一萬天偶像給一百天偶像的加持。

當你封一個人為終身偶像,你難以避免地會有點走火入魔,例如經常會將偶像掛在嘴邊。

廣告

無論談到什麼話題,粉絲都可以扯來一句:「唔係喎,你睇吓林海峰。」

有人話。

家裏的家傭好蠢啊,唔炒佢已經算好好。畀足人工佢,畀足假期佢,畀足三餐一宿佢,喂,仲想點呀。

唔係喎,你睇吓林海峰。

人家訪問林公子,你覺得家裏的英雄是誰?答老婆或阿媽應該冇走雞,但林海峰說,家裏的英雄是家傭。「調番轉,你會唔會離開你自己屋企,離開你自己嘅親人家人,去服務另外一個家庭?比起我哋,佢哋真係英雄。」

做人同做老細一樣,能夠 hold the same standard for yourself as you have for others,已經是人上人了。

又有人話。

做四大天王好定做商台 DJ 好?傻的嗎,梗係咗四大天王啦。

唔係喎,你睇吓林海峰。

憑著「演藝」在香港做出成就不容易,沒有外表沒有唱功沒有演技 (sorry 我覺得佢真係冇),很多人爬到三樓便是終點了。Mr. 903 這樣說:「其實每個人嘅本能或者才華係被逼出嚟,我哋唔應該低估自己嘅可能性,無論做嘅係好高,定係好低。」

咁即係點呀?政治唔好講喇,膚淺啲,講樣啦。原來黎明和林海峰是同年的,都屬馬。二十年前問你,做黎狗定林狗,答案呼之欲出;今時今日答同一個問題,答案都呼之欲出:橫掂都係做一個阿叔,梗係做一個跑到 sub-4 望落仲似三張幾嘅阿叔。

都有人話。

放過周栢豪啦,人哋有家室有仔女,要搵錢㗎。你睇嗰啲冇跪低嘅,全部都冇仔女㗎,梗係冇所謂啦。

唔係喎,你睇吓林海峰。

其實成功把尺應該擺喺邊?搵三十萬一個月嗰位係咪代表比搵三萬嗰位更成功?有啲人覺得就係咁,於是換來的人生,就變成是只看 dollar sign 的選擇、只看 dollar sign 的未來、只看 dollar sign 的伴侶。

成功不是這樣的,偶像不是這樣的。越喜歡就越羨慕,越羨慕就越喜歡,這便是偶像了。

同埋都係嗰句,you are who you love。

正所謂。

無論戶口有幾多個零,都唔及一個彭羚。

作者 Facebook