立場新聞 Stand News

唔好放棄

2019/1/3 — 18:42

古天樂、圖片來源:viutv片段截圖

古天樂、圖片來源:viutv片段截圖

以前閒閒地一周平均做 70 小時,日瞓 4、5 個鐘頭,完全無問題之至,因為我鍾意學嘢,解決問題同埋創作,又有錢收,又有取之不盡嘅機會,何樂而不為,辛苦有價值,爽呀。

廿五歲結婚,租咗一個單位,建築面積 220 呎,月租 1,500 大元,擺咗大床傢俬電器,見光位淨番 100 呎左右,細到可以攤喺地下,用腳㩒電視機掣,掃地抹地大掃除,三扒兩撥,話咁易攪掂,太幸福囉,快樂到今日,覺得總有出頭天,皆因我心存希望,超爽。

但今時唔同往日,對住啲後生仔,我都唔知點鼓勵佢,虛假的說話講唔出口,真話往往令人難受,變成啞口無言,唔能夠將一個好啲公平啲法治啲民主啲上流機會多啲啲嘅香港,交畀下一代,愧對年輕人,勁唔爽。

廣告

奉勸各位,做人自求多福,耷低頭鬥智鬥力,取長補短,避重就輕,遲早青出於藍,時間永遠企喺年青人嗰邊。只要自己積極正面,活出風格,幽默以對,唔使理其他人點諗點講點批評,只有思想殘廢、霸著毛坑不拉屎、唔識自重嘅人,至會隨便話人係廢青。

古天樂話齋:「我真係好鍾意唱歌㗎,只係唔識唱啫。」連古仔都可以攞到最喜愛男歌手,即係歌影視大滿貫,咩都可以發生,香港人,尤其年輕人,唔好放棄,隧道盡頭可能 maybe 或者有曙光。

廣告

 

#nevergiveup
#thingswillgetbetter
#believeinhk
#香港加油
#抄田少零舍爽

作者 Facebook

發表意見