立場新聞 Stand News

喺香港地有咩好做?

2020/10/6 — 22:07

社區遊地圖(Local_9up 製圖)

社區遊地圖(Local_9up 製圖)

對香港好似好熟悉,但又好似唔係。好多人話香港係彈丸之地,但又未必人人真係有行哂香港十八區。各區好似係屬於我哋生活環境一部分,但又可以話係我哋唔認識嘅世界。有時真係要多啲行下其他區,先可能對香港有更立體認識。

今次介紹一條路線,相信鍾意影相嘅朋友會鍾意,大約由長沙灣至深水埗嘅範圍。其實依條路線好多地方都係因一個朋友要幫「街坊帶路」做嘢搵資料,而拉埋我去影相落區。之後我再整合網上嘅資料而成。依段路會由繁囂走到僻靜,再回歸熱鬧,起伏於人流、車輛與聲浪之間。

起點由蘇屋邨巴士總站出發,然後(主要)沿住保安道或元州街向深水埗方向行。

廣告

蘇屋邨巴士總站已經好值得去。依度係傳統巴士總站設計,以紅白色為主調,車坑設計同出邊唔同,大多數車坑純以水泥而建,無用到鐵欄圍杆,跟大部份出邊嘅巴士總站每條車坑都有圍杆唔同;而每條車坑嘅頂部同柱身外觀都係長方形,又同出邊以圓邊唔一樣,一眼望去就係「有 feel!」

蘇屋巴士總站

蘇屋巴士總站

廣告

由巴士站落返去保安道,好快就會見到香港碩果僅存嘅弧形騎樓(網上有好多關於依度嘅介紹)。另外,只要細心留意附近一帶唐樓,就會發現好多都係用好靚嘅水磨石樓梯,舊時對於美學要求細緻用心得多。

水磨石樓梯

水磨石樓梯

然後,再上返順寧路,去「長沙灣肉食公司」,估計間鋪頭都開咗好耐。個招牌係北魏字體,有個字甩咗喺篷頂。而之前有網友話入邊有個鐘幾特別,後尾去咗睇,似古典鐘,一個豬肉檔入邊竟然有個古典鐘,而個鐘好似黐實咗喺牆到,感覺好似同間鋪共生咁,相信只要個鐘一日仲行緊,間鋪都會一直經營落去。

再落返去元州街,喺昌發工廠大廈到有間已結業嘅樓梯鋪,我覺得個招牌幾特別。因為比較少會有沿住弧度嘅鐵製可口可樂牌。年月為佢鋪滿灰塵同燻黑。伸手可及嘅鐵製弧形廣告牌,是咪一種已經遠離我哋嘅舊日工藝技術?

樓梯鋪

樓梯鋪

下一站係宇宙商場。聽朋友講,以前依度係年青人蒲點, Neway 係商場熱點。商場外有個小巴站,朋友話以前啲人坐小巴嚟依度蒲個陣,落車會嗌「宇宙有落!」好似真係坐太空船去到宇宙咁。而後尾喺網上睇到,原來以前商場入邊嘅警衛同管理員名牌都會印上「宇宙警衛」同「宇宙管理員」,維持「宇宙」嘅秩序就真係靠哂佢哋喇。入去宇宙商場同宇宙警衛打完招呼,再去招牌帶點宇宙 feel 嘅 Neway,點唱洗腦 K 歌花花宇宙 —

「將平凡 成為迎風的帆
 將搖籃 成為藍天的藍
 細世界 會變花花世界
 OEO OEO OE OE
 更多更多渴求 會有更多報酬
 更高更高享受 為什麼不追求
 每天有新星球 發揮你小宇宙 」

一於宇宙到底啦(9up 完)。

宇宙商場

宇宙商場

之後再一直向前行,會見到有新天書業,極多唔同種類嘅二手書,想尋寶就花啲時間喺到;對面係天悅廣場,個招牌設計類型,我估依家應該唔會再有,同朋友入過去間商場,可以話已經荒廢咗,當踏入商場,大門關咗,空氣好似沉澱咗,有陣好濃烈嘅霉味,會有時間靜止咗嘅感覺。Btw 朋友喺商場入邊由頭咳到落尾。

新天書業

新天書業

再直行,會到嘉頓中心,係二級歷史建築。有興趣可以入去行個簡約到再不能簡約嘅歷史展覽。而個展覽又要歷史又要簡約是咪就係話俾大家知,香港地就算被評幾多級歷史建築都好,最多最多都只係保留部分,保育歷史永遠做啲唔做啲,杯水車薪,同嘉頓中心命運一樣?不過嘉頓中心大門都永遠歡迎香港市民嘅,但 green object 就唔好入去喇,香港人嘅麵包唔啱你哋,大陸嘅海底撈先啱你哋多啲。

喺嘉頓麵包對面係陳樹渠紀念中學,而唔講唔知之依度曾先後成為德貞女子中學、香港培道中學、拔萃女書院、英華女學校校舍。

陳樹渠紀念中學

陳樹渠紀念中學

跟住去嘅兩個點,可以話以前做生意嘅人會重視代表住商譽嘅「金漆招牌」同「打開門做生意」嘅象徵意涵。落去元州街,就會見到可能係香港最靚嘅店舖招牌 —「麗光」,個招牌明淨、簡潔、典雅!之後可以行到南昌街,上返大埔道,會見到恆生銀行古式銅閘,其實留意到依個古式銅閘,係因為一望到就即時醒起曾經喺 Facebook 討論區,見過有人分享「香港隅地」內容, 如果無睇過個 post,我估經過都唔會特別留意到。依款有古典美嘅古式銅閘只會隨著時間而消失。另外「香港隅地」亦有分享到網友提供嘅資訊,話門口樓梯設計係風水嘢,「食三煞,鬥三煞格局」。

恒生銀行古式銅閘

恒生銀行古式銅閘

之後再往前,無耐就會到東廬大廈,入邊有間中央飯店,個名已經好有民國時期感覺,係間傳統中式酒樓,已經有差唔多六十年歷史,仍然保留推車仔叫賣點心。

中央飯店

中央飯店

完〜

其實沿路見到嘅事物都係大多數香港人日常生活會去 / 經過嘅地方,不論巴士站、商場、書店、麵包店、學校、銀行、酒樓等等,可能會有部分人覺得依啲地方無咩價值、好瑣碎、平平無奇、可有可無。但其實依啲地方一直承載住香港人日常生活回憶,係好多香港人嘅生活方式。有依啲瑣碎地方串連埋一齊,就開始建立到社群,產生鄰里關係,社區先會出現一種固定感。而生活上嘅固定感係每個人必須品,因為咁樣先會有家嘅感覺,所以依啲地方可以話對我哋嚟講好重要。對依啲地方做紀錄,並唔係只係單純跟美與不美有關,而係出於對香港有感情。

仲有,個人認為日常生活其實就係最能反映到本地文化嘅。我哋好多時去旅行都會想去睇、去見識當地最地道嘅事物,實行深度遊旅行。大家又有無試過喺香港深度遊?喺全球封關下,大家都可以喺本地多啲深度遊,而唔需要俾 $380 去行山「森度遊」。

依個 post 純粹提供一個契機,等大家可以留意多啲生活上嘅事物,有時習以為常嘅事物,可以從另一個角度去睇,會有唔一樣嘅發現,真係「細世界 會變花花世界」;同埋都需要一個傳一個,幫香港紀錄多啲。其實如果唔係朋友帶我行,無網友同網上其他人分享嘅資料,我都唔會留意到咁多嘢。

 

Local_9up Facebook

發表意見