立場新聞 Stand News

天生二品 — Jace 陳凱詠

2021/5/9 — 15:37

Jace Chan 陳凱詠 - 《天生二品》 MV

Jace Chan 陳凱詠 - 《天生二品》 MV

【文:愛・香港流行文化】

Jace可以話係近期冒起得最快既女歌手,雖然作品唔多,但係每首風格都唔同,吸引到好多樂迷,作為出道咗咁短時間既歌手前途真係無可限量。嚟緊我會簡介吓佢既風格,同埋點解咁多人鐘意佢。

佢首先令比較多人留意到既作品係 <天生二品>,依首歌不論曲詞都同主流廣東歌好唔同,但係聽落又好特別,旋律仲好洗腦,真係聽完都想去打邊爐,從依首歌已經睇到依個女仔既不平凡。下一首作品 <隔離> 更加係爆紅,首歌取材雖然係主流情歌,但係曲風同唱法又比較特別,加上同顧定軒拍既 MV 好有質素,令一班聽開廣東歌既聽眾開始留意佢。合唱版同林家謙合作更加將依首作品既感情昇華,佢地兩個把聲好夾,合唱部分就算有好多歌詞都唔會聽得唔舒服, 可以不停單曲循環,<隔離> 亦因為咁成為上年最多人聽既廣東歌之一。其他作品好似 <想突然> 同 <虛擬人與我> 都好有特色,而嚟緊 Jace 會出第一張個人專輯,個人就好期待。除咗唱歌之外,佢間中都有拍戲同做主持,最有印象係佢做激安百貨主持,因為佢講野清晰把聲又好聽,所以就算係介紹產品都唔會好悶,再加上佢節奏掌握得唔錯,係依方面佢係幾有潛質。

廣告

Jace不論唱歌風格同造型都係行走於主流同非主流之間,令到佢可以喺一眾女歌手中脫穎而出。佢既歌與眾不同得嚟又符合大眾口味,造型上更加睇得出佢花咗唔少心思,特別係髮型,真係見到一次就會記得,而服裝上雖然未到騎呢,但同其他歌手都好唔同,令佢好容易比觀眾認得。

而點解咁多人鐘意佢?除咗特別既風格外,Jace唱功的確唔錯,作為一個年輕歌手,每一次live都好穩定,快歌跳唱好似 <天生二品> 同埋chill club表演既 <重口味> 佢都輕鬆carry到;而慢歌好似 <隔離> 不論合唱同獨唱都可以唱到 CD 水準。佢既唱腔同把聲好令人著迷,咬字清楚又好聽,所以吸引到一班歌迷。而佢喺IG既post,或者係fans club tg group入面同一班二品官吹水既時候,都比樂迷感覺到佢私底下係好玩得又貼地既歌手。

廣告

Jace作為一個出道唔耐既歌手,已經比樂迷睇到好多可能性,更加累積咗一班忠實fans,好期待佢未來會再帶咩新嘗試比我地。

作者簡介:一個鐘意香港流行文化既後生仔,得閒會寫吓文用大眾既角度講吓廣東歌、香港既電視節目同電影,希望未來有多啲香港人留意香港流行文化。Instagram Page / Facebook Page

發表意見