立場新聞 Stand News

宅 Guide

2020/7/14 — 15:56

作者製圖

作者製圖

三國時期,史上奸狗之王曹操眼看漢中陽平關一帶久攻不下,對方防衛固若金湯,已方損兵折將軍心疲累,於是心生一計裝其彈弓,先率領全軍撤退,待對方以為穩操勝券,防守稍為鬆懈之際,曹軍回頭猛攻一舉拿下漢中,從此長驅直進!

後世軍事學家稱曹操此戰略為「回馬槍」!

當大家以為逐漸走出 19 肺炎嘅陰霾之際,冷不防個病毒原來有睇《三國演義》,學咗曹孟德嗰招一個屈尾十殺番轉頭,仲水銀瀉地般走入多個社區,限聚令關閉乜乜關閉物物馬上出台,睇嚟再次 lockdown 嘅日子應該迫在眉睫好快又嚟了!

廣告

再次閉關與其宅於家中虛度光陰,不趁機會運用科技學下嘢睇下嘢,多一技傍身分分鐘世界通行,退一萬步諗學多啲嘢睇多啲嘢梗無衰,總好過喺屋企無所事事悶到生蘑菇吖!UncleBen 總結平時嘅孤寒上網學嘢大法加上上次 lockdown 經驗,可以同大家分享一下「宅在家中上網學嘢 Guide」,簡稱「宅 Guide」。 

【運動健身】

廣告

無得去 gym 困喺屋企煲劇打機食嘢,最容易係令身材失守,未善解人意已經肥頭耷耳,其實即使在家中無乜架生,就咁用 bodyweight 一樣可以練到身水身汗手瓜起腱,呢幾個係好有用又好睇嘅 YouTube Channel:

Jordan Yeoh Fitness
Jordan 每個動作解釋得好詳細,有啲更係同一個動作分開進階級同正常級,正常智商同體能實跟到!

THENX
Chris Heria 係 Jordan 嘅靚仔型仔版本,動作深少少難的多,但勝在啲片有型好睇,跟到佢做一部份都不自覺地覺得自己型咗靚仔咗,而且佢教嗰套對打造身型好有幫助,但當然本身要有多少基礎!

shuaisoserious
介乎 Jordan 同 Chris 中間,動作容易跟隨,相對輕量級啲,但時尚感同趣味性都比前兩者高。

Utah Lee
女仔可以參考 Utah,Nike Global Master Trainer,睇個 title 都知道不得之了,香港健身界應該無乜人唔識,主打 Zumba fitness 等減脂運動!

Coffee Lam
新冒起網上瑜珈健身教練,有過百萬 subscribers,據本人家中三份二人口觀賞及跟隨運動經驗透露,非常有效及容易跟進學習。

【看世界看生活看文化】

互聯網嘅世界無遠弗屆,通過 16:9 屏幕,幾遠嘅世界都被帶到眼前目下,有啲嘆為觀止大開眼界,有啲浪費時間睇到反眼,下面係幾個賓叔叔一直睇開嘅 channel,不喜勿插!

一条 Yit
上海前《外灘畫報》總編輯創立嘅平台,堅持每日製作一條視頻,內容有關於建築,關於生活關於文化,關於話題,關於 lifestyles,足跡遍及全世界,製作精美不落俗套。

Peter McKinnon
著名攝影師,教你點影靚相點執相,點擺機點取景,點樣用盡你台相機,然後你會發現好多人影相拍嘢都係跟佢個方法。

Movieclips
好多以前睇過嘅電影唔記得咗?呢度可以將成套戲濃縮成三幾分鐘俾你回味一下,睇啱即刻又可以上網搵番完整嘅嚟睇,正!

品味壹番 A Matter of Taste
林一峰說威士忌,呢個林一峰唔係香港個林一峰,唔係林二汶個大佬,係台灣人係威士忌專家,成個 channel 淨係請威士忌,由起源到釀製到不同產地到點飲至好,睇睇下都唔小心醉醉地。

寫咗兩項已經咁長,下一篇再講煮食 ,搵食同其他嘢。

未完,待續……!

發表意見