立場新聞 Stand News

布口罩究竟有冇用?

2020/2/17 — 17:50

作者製圖(圖片素材來源:朱凱廸 Facebook)

作者製圖(圖片素材來源:朱凱廸 Facebook)

喺特區政府「積極不做嘢」嘅帶領下,香港人抗疫真係難上加難,外科口罩一罩難求嘅情況持續多日都仲係咁嚴重。早前,元議員教大家蒸口罩,有腦嘅香港人相信都冇比佢呃到。但口罩荒持續,最新就有朱凱廸議員教大家自製「布口罩」,有人讚有人彈。本 page 就相信科學證據嘅,唔好隨便吹水,我地一齊睇下布口罩究竟有冇用。

TLDR:布口罩絕對比外科口罩差唔少,絕對唔足以令人放心。但冇足夠證據比較布口罩同唔戴口罩分別有幾大。而布口罩缺乏統一規格亦令效能參差。

廣告

關於布口罩嘅科學研究唔多,但喺 2015 年,有團隊搵咗約 1,600 名醫護人員,進行一個隨機對照試驗(RCT),將約三分一人分配去戴外科口罩,三分一人需戴布口罩,三分一人做對照組(隨便佢地想戴咩就咩)。(礙於研究倫理,並無一組研究對象係唔比戴口罩嘅)

重點一:醫護人員出現「類似流感病症」(Influenza-like illness),定義為 38 度以上發燒及最少一個呼吸道症狀,喺布口罩組中比起外科口罩組中,機率高出十三倍(RR: 13.25, CI 95% CI 1.74 to 100.97),達到統計學上顯著差異。

廣告

重點二:研究分析兩種口罩嘅過濾能力,布口罩嘅粒子穿透率達 97%,而外科口罩只有 44%。

可見,布口罩比起外科口罩嘅效能相距絕對顯著。值得一提嘅係,研究中布口罩組嘅醫護人員已經係有超過九成日子有清潔口罩先重用,效果仍然欠佳。論文中提及幾個可能因素令布口罩效能欠佳:布罩容易潮濕、重用容易影響效能、過濾能力欠佳。

而我亦搵到另一份研究去分析布口罩過濾粒子能力,雖然呢份係環境學研究,分析空氣污染粒子而唔係病毒,但亦比大家參考:

  • 冇氣閥嘅普通布口罩過濾率:39-46%(視乎唔同牌子、物料)
  • 外科口罩過濾率:78%

相信大家都知外科口罩先係標準做法,而朱凱廸議員都係出於好心,希望係艱難時刻幫到冇外科口罩嘅街坊,可以「用住先頂住先」。的確,我亦搵唔到研究分析究竟布口罩相比咩口罩都冇分別有幾大。但最怕係大家唔了解足夠清楚,誤以為布口罩同外科口罩效能係接近相若,貿貿然戴個布口罩就覺得好安心,然後放心周圍去,結果弄巧成拙,提升咗感染風險就唔好。

希望大家都可以將呢個訊息傳開去,布口罩係絕對唔足夠,布口罩係絕對唔足夠。如果冇哂外科口罩,又確實需要出街,的確可以考慮試用,但絕對唔好因為有布口罩就掉以輕心,都應該盡量避免外出或到人多地方,勤洗手,保持衛生。

大家保重。香港人加油。

 

參考論文:
Macintyre, C., Seale, H., Dung, T., Hien, N., Nga, P., Chughtai, A., ... Wang, Q. (2015). A cluster randomised trial of cloth masks compared with medical masks in healthcare workers.BMJ Open, 5(4), E006577.
Shakya, K., Noyes, A., Kallin, R., & Peltier, R. (2017). Evaluating the efficacy of cloth facemasks in reducing particulate matter exposure.Journal of Exposure Science & Environmental Epidemiology, 27(3), 352-357.

作者 Facebook

發表意見