立場新聞 Stand News

平行時空下的戲院里

2020/5/9 — 6:09

美容院重開,好多 chat groups 都有人話 book 唔到整甲同 facial ,未來幾日預約情況有 D 緊張,其實都算係喜訊。

今日開工前,約咗位一早就 book 好曬全日 appointments 嘅小姐到中環食晏,食完叫我陪佢去戲院里補鞋先去修甲。我有點詫異,因為從來只聽過佢話太多鞋要掉,未聽過佢要補返任何舊鞋繼續著。

我幫襯過地鐵出口兩公婆一齊做生意嗰檔幾次,都 OK ,諗住介紹俾佢。但佢無問我就停咗喺出口右邊婆婆呢檔,檔口比較冷清,婆婆身後待補嘅鞋亦明顯比另外兩檔少。

廣告

「呢隻鞋個踭塊墊甩甩哋,黐返要幾錢?」朋友問婆婆。

「哦…呢度搣開再黐返就得。 45 蚊啦。另外一隻……仲著得,唔洗整。」婆婆認真檢視完右邊嗰隻就睇埋左腳嗰隻。

廣告

「Err…整開就一次過整埋啦。」朋友加多句。

「吓?無爛都整埋啊?好,都得。八十五喎。」整兩隻仲有折。

朋友遞上張一百蚊紙。婆婆開完單就伸手攞錢找,朋友話:

「唔洗找啦,你可唔可以幫埋我抹返乾淨對鞋啊唔該!」佢邊講邊放埋銀包。

「哦,得,好,多謝。」婆婆繼續低頭將膠紙貼在涼鞋底。

望一望呢位水晶甲甩剩一半嘅朋友,有點感動,真係唔好睇少港女嘅威力。

睇完一幕貼心,再睇立法會直播住一幕幕荒謬。

香港真係一個容易令人精神分裂的地方,呢度有人喺戲院里默默耕耘,用緊自己綿力去嘗試補救返呢幾個月大家失去咗嘅嘢,就十分鐘路程之外,卻有人在盡情破壞用百幾年建立返嚟嘅嘢。真係不知所謂!哀我香港。

原刊於作者博客作者 Facebook 專頁

發表意見