立場新聞 Stand News

《幻愛》中的輕鐵只是幻象

2020/7/22 — 14:29

作者製圖

作者製圖

【文:平凡人的都市學】

睇完《幻愛》,相信有唔少區外人都會覺得輕鐵好靚,想入屯元天行返轉。不過如果你想走入屯門,你最好收起幻想,事關輕鐵其實係屯門人嘅一場惡夢。

以為輕鐵好浪漫? 事實係會迫死人!

廣告

《幻愛》其中一幕,講到男女主角迫喺乘客中間,加上輕鐵例牌唔穩陣,兩位主角就迫下迫下迫出愛火。身為屯門人見到依幕,真係不禁悲從中來,笑咗出聲。要喺輕鐵搵到真愛就無乜可能,不過擠迫人多真係每日都有。「喂!阿叔!咪貼咁埋喎!」

根據立法會文件,港鐵喺每朝最繁忙嘅一小時入面,載客量最高可以去到94%,#每日載客49萬人次,好比全個屯門區嘅人口突然一齊搭輕鐵。輕鐵設計理論上每平方米可以企到8個人,載客量最多大約240人,不過計埋大家嘅背囊、手推車、以及有位師兄肥少少咁樣,車廂每一平方米就大約企咗6至7人左右。大家迫到咁埋,我諗感受到嘅會係汗臭,而唔係愛情。

廣告

唔夠快、無速度、跑得慢

正所謂「人多擠迫唔緊要,坐極都未到是關鍵」,輕鐵唔止多人搭,佢嘅速度都一直為人詬病。輕鐵全長36.2公里,總共68個車站,除開大約每530米就有一個車站。對比地鐵91公里有53個車站,每站相隔大約1716米嘅成績,#輕鐵站嘅密度足足係地鐵三倍。

輕鐵車速因為站距所限,平時行到最快都係30至50公里每小時,只有小部分特長路段(例如洪水橋—坑尾村)先會上到70公里每小時。當然輕鐵無辦法直接同地鐵比較,但係對比巴士、小巴,輕鐵身為「鐵路」其實都唔快得幾多。以屯門西鐵站走入屯門碼頭為例,大家搭507可能需要15分鐘,但其實你搭巴士/小巴都係差唔多。

月台很浪漫?事實是月台很麻煩

雖然大家睇電影時,一男一女喺月台上攬嚟攬去,可能覺得月台好浪漫。又者一個男人望住架輕鐵駛走,等到月台上空無一人,都會覺得依啲就係男人嘅孤寂。甚至乎有啲人見到輕鐵路軌上面嘅每粒碎石,都會幻想一對情侶可以沿住路軌行獨木橋。可惜事與願違,幻想往往都比現實殘酷。

輕鐵 同 電車 唔同,其他汽車一般唔會駛入輕鐵路軌範圍,所以好好地一段路,唔少部分其實都畀段路軌霸咗。相信元朗人都會感覺得到,大馬路本身都已經車多,跟手一條路軌攔腰瞓喺中間,條馬路又好似即刻窄咗一半。加上輕鐵月台係特別比路面架高一啲(就返輕鐵高度),因此連月台本身其實都霸住唔少路面,做成當區馬路發展嘅先天障礙。

所以有啲嘢,真係外人睇落誇啦啦,自己心諗咪搞啦。

作者 Facebook

發表意見