德國廚房設計心得

趟門 

大家可以考慮用趟門作為廚房門,既可以節省空間,又可以阻擋油煙氣味。開放式廚房雖然開揚,可以連接飯廳廚房面積,但係如果唔係淨係食麪包沙律過世的話,都係有門設計比較好。

當建造價錢以米作計算…

德國人通常會搵 Küchenstudio 幫手設計廚房。當時我請嘅 Küchenstudio 係用 Laufmeter(用腳步計算出廚房面積,用米嚟做單位)嚟計我廚房嘅建造價錢,包括特別嘅櫃或者設計都係以米計。即無論設計和建造是簡單或複雜,價錢都係一樣,咁設計上梗係諗盡啲啦。  

如果大家係諗住設計自己物業嘅廚房,而又鍾意煮嘢食,咁就應該揼本投資同打造個廚房啦。 

櫃面要啞面 

櫃面如果係「令」面(德文:Hochglanz)的話,好容易留低手指印、油漬或者污糟嘢。如果用啞面,摸落去的質感好啲,又可以少啲手指印等問題。總之,最好揀個容易打理,唔容易見到手指印嘅物料做櫃面。 

凹入嘅手把 

手把(Grip)的話,不妨考慮用一個凹入去嘅設計加上一個金屬框做手把。提升視覺效果之餘,又唔會有個手把突出嚟,驚行過會「逛」到衫褲。 

旋轉式櫃架 

可旋轉式櫃架(德文:Apothekerschrank)可以放到好多嘢,而且可以向左轉或向右轉 90 度,令到啲嘢無論放喺前面定後面都好容易拎到出嚟,用盡櫃架內的空間。 

雪櫃同冰格 

如果要買雪櫃同冰格,唔怕買個大啲嘅。買雪櫃,可以考慮一下 Miele 呢個牌子。雖然價錢係好貴,不過做廚嘅朋友同佢嘅同行人士都一致認為 Miele 的故障率係最低嘅,係眾多牌子中嘅不二之選。 

焗爐嘅設計 

至於焗爐嘅設計,大家可以將焗爐放喺較高嘅位置,並將焗爐的門設計成打開之後可以收入去焗爐下面。咁放嘢入焗爐同埋拎嘢出焗爐就會變得好方便啦。 

洗碗碟機 

洗碗碟機係德國人廚房的標準設備。洗碗碟機最緊要夠大;入面嘅間隔可以自由分配。 

如果你買 Miele 嘅洗碗碟機的話,我建議可以加少少錢幫個洗碗碟機裝上一個叫做 AutoOpen 嘅功能。有咗呢個功能,部機洗完啲碗碟之後,會自動打開一道小門縫,機入面嘅水蒸氣就可以放出嚟,咁啲碗碟就會保持乾爽。 

善用廚櫃的死角 

大家可以考慮下喺廚櫃角落放啲唔常用嘅煮食工具,同埋用一個可以摺疊嘅趟門作為櫃門,方便拎嘢出嚟。至於工作枱下面嘅角落可以利用一個腎型嘅櫃架嚟儲物。 

窄身趟櫃 

當大家設計廚房嘅時候,可以預留返少少位造一個窄身細細哋嘅趟櫃,用嚟掛吓毛巾﹑放洗潔精等等。 

 鋅盤 

設計鋅盤時,記得一定要儘量令到個高度同工作檯完全水平(德文:Bündig),避免有條凸起嘅邊,條邊好容易邋遢,亦都唔方便清理。 

物料方面可以考慮採用塑膠嚟造鋅盤。塑膠唔單止唔易爛、唔易整花、唔驚會留低水漬﹑仲好易打理。 

工作檯 

設計工作檯嘅時候,如果想可以喺張檯上面直接切嘢、將啱啱煮好食物而又熱辣辣嘅煲直接放喺張檯上面都冇問題嘅話,我提議大家可以用石或者石英等物料嚟做工作檯面。 

廚房燈光 

至於廚房嘅燈光,最緊要夠光猛。記得要揀支好光猛、光線又可以平均散發喺廚房內嘅燈,咁煮嘢食時就乜都可以睇得一清二楚。如果可以嘅話,不妨都將廚房嘅窗整大啲﹑闊啲,咁採光都好啲。 

電磁爐(Induktionsherd) 

電磁爐(Induktionsherd)的性價比係眾多種爐具入面最好嘅,煮食又快、易清潔打理。同樣,設計電磁爐嘅時候,記得都要儘量令到爐個高度同工作檯完全水平。 

抽油煙機 

由於當時搵唔到位放抽油煙機,我特意揀咗 Miele 的電磁爐,因為 Miele 電磁爐設有內置抽油煙機。煮嘢食嘅時候,油煙會被抽到中間,經過活性炭過濾再由地面嘅排氣口排出。 

工作檯後面塊板的物料 

工作檯後面塊板係一塊組合板,表面就鋪咗一層金屬物料。就算有油彈到落去都好易清理,保持整潔。 

工作檯下的組合櫃 

我用咗鐵軌(Rail)嘅設計嚟代替之前嘅金屬框手把,要打開櫃桶就直接拉塊櫃桶板就得。避免使用凸出嚟嘅手把,而成個櫃面一致又好睇。 

工作檯上面的櫃 

我為這個櫃設計咗一度上下升降嘅櫃門,咁就可以避免左右開門所導致嘅麻煩,例如開咗櫃門之後會頂住咗自己。 

廚房裏的餐桌 

如果大家屋企廚房夠大,可以考慮放張細細地嘅食飯檯喺廚房。有時煮完飯又唔想出廳食的話,可以喺廚房一家人一齊食早餐,飲杯咖啡,坐吓。 

廚房裏的雜物房 

如果廚房唔係好多空間,或者想廚房望落乾淨企理,不妨考慮間一間雜物房(Nebenraum),將唔常用嘅嘢放入去,例如微波爐、水果等等,到用嗰時先入 Nebenraum 攞。 

廚房直達花園 

可以設計一度門由廚房直通花園,咁就方便煮食時到花園直接採摘新鮮食材。喺花園我用咗 Hochbeet(英文:Raised bed)嚟種嘢,呢個方法可以避免害蟲侵食植物。Hochbeet 隔籬有個堆肥,平時會將廚餘放入去,等佢分解咗之後變成肥沃嘅泥土就可以將佢放返入 Hochbeet 當泥土用。 

唔知呢條片有冇畀到大家一啲設計廚房嘅靈感?如果大家鍾意呢條片,請按 Like。如果仲想知多啲我屋企嘅其他設計,歡迎大家喺下面留言! 

廚房設計嘅美學係由我老婆話事,技術方面就係我做主導。記得同 Küchenstudio 溝通之前一定要識啲相關字眼,咁就可以同 Küchenstudio 傾嘅時候得心應手啲啦! 

 

延伸閱讀:  
【德國生活分享】十二月過年  
【德國生活貼士】香港人喺德國揸車,有咩嘢要留意? 
【移民諮詢】想移民?諗清楚先!石賈墨德國移民諮詢服務

作者網誌

編輯推介

    發表意見