立場新聞 Stand News

快樂的層次

2020/7/18 — 11:57

資料圖片,來源:Alice Cheung @Pixabay

資料圖片,來源:Alice Cheung @Pixabay

有次同一班長輩飲茶,同桌有位唔熟嘅朋友帶埋十幾嘅女出嚟。佢一坐低就話想食菠蘿叉燒包。一嚟到,佢無留意到我其實夾緊舊蝦餃,就第一時間將自己想食嘅轉到自己面前。

我下意識驚一驚,因為如果我細個咁做,我諗我隻手未掂到個轉盤,就已經有專人用筷子打落手背。

但冇事發生。好彩,我都唔想尷尬。

廣告

嗰位小姐夾起熱辣辣嘅菠蘿叉燒包,冇大啖大啖食,而係首先搣咗面嗰塊「菠蘿」,再喺個包面開個窿,挖曬入面D叉燒食,再將麵包掉喺骨碟上。我諗呢個走包 combo 真係好好食,因為佢三個食曬。

佢媽咪一直冇反應,係去到個女夾埋第三個包,有位長輩皺一皺眉,先講咗句:「唔夠食再嗌。」

廣告

都幾嘆為觀止。

飲茶真係好多學問。細個唔明點解食第一舊會俾人鬧、食最後一舊又俾人鬧。大大吓就明原來飲茶唔係淨係為咗食咁簡單。而茶樓裏面嗰種你一舊我一舊嘅愉快互動亦係食其他餐廳搵唔到嘅。

人生如是。

快樂有好多層次,滿足口腹之慾係一種快樂,能夠將心比己係一種快樂。自私自利、一味捍衛自己收成的嘅人,去到邊都淨係為咗攞盡著數,以為好威,但卻唔知自己爭到返嚟嘅只係世上最淺層嘅快樂。可憐,因為食到滿肚腸肥,卻根本好似冇活過一樣。

原刊於作者博客作者 Facebook 專頁

發表意見