立場新聞 Stand News

抗疫好煲劇 — Better Call Saul

2020/4/2 — 17:25

Better Call Saul 劇照

Better Call Saul 劇照

【文:招文軒】

成個 2020 年春天近乎足不出戶,相信韓劇都煲得七七八八,劇荒似乎係做下新嘗試嘅好機會,例如我近期至愛 —— 絕命律師 (Better Call Saul,下稱Bcs)。點解個名咁熟眼?之唔係因為呢套劇,正正係連最難湊嘅連登仔都眾口交譽嘅頂級神劇 —— 絕命毒師 (Breaking Bad,下稱 BrBa)……嘅前傳囉!貴為為神劇 spin off,光環之下,Bcs 究竟有冇料到?家陣睇到屍身 five,可以話絕對冇失望!

Bcs 完美延續 BrBa 嘅極高製作水平:明眼人一眼就明嘅超班剪接構圖運鏡打光,而另一個大賣點,就係可以一路睇呢套前傳一路慢慢追溯返BrBa之前發生過咩事。有睇過BrBa 嘅相信都會對 flamboyant 到在任何地方也像開四面台,但又行事可靠、怪招盡出嘅律師 Saul Goodman 好有印象。對 BrBa 主角 Walter White 嚟講,個個唔係豬隊友就係神對手,冇幾多人企主角嗰邊又真係幫到手,隨傳隨到,收錢即 do,仲要你未諗嘅都幫你諗埋(例如手把手教你洗黑錢),直頭夫復何求,我係主角,就已經攬住佢嚟錫。戲劇效果嚟講,BrBa 個個兇神惡煞黑口黑面時,有佢襯到件西裝七彩又烚熟狗頭咁面口對住你,成個畫面多左嗰度喜感,都真係當堂就平衡返。

而睇 Bcs,就可以睇到 Saul 呢個自學成材嘅萬能律師點做到全 Albuquerque 撈偏嘅各路牛鬼蛇神都靠佢做生意。係勢利守舊嘅訟壇將 Saul 趕上絕路,定係 Saul 釋放內心魔性,拒絕打乖乖牌?唔係教你壞,而係等你睇下一個人,可以點樣同自己條命鬥,同個世界鬥,同埋佢會點鬥輸;同時間真切咁學識咩叫報應,出得嚟行,遲早要還。費事劇透,講住咁多先。

如果你睇完 BrBa 再睇 Bcs,你一路睇,會慢慢見返之後 BrBa 會出現嘅咁多位精彩配角,例如做嘢時口水多過浪嘅緝毒署兩兄弟,大大嚿又曉妙手空空嘅Huell,又抑或學到壞過凱婷嘅秘書仔 Francesca,等等,你會好似見返晒啲老友咁;同時間又會更加深入了解到 BrBa 嘅背景。唔改變既定局面嘅限制之下,寫到集集高潮迭起驚喜陳出,但又合情合理駁佢唔到,樣樣嘢有頭有尾,就好似搵細細塊貝殻仔雕晒成個仙境出嚟咁,你估咁易?Bcs  正係完美示範,高手到離晒大譜。

比例上文戲居多,但一啲都唔悶。睇住Saul一步步爬上嚟,又靠旁門左道一單又一單官司咁贏,湊埋咁多律師法官各色客仔,足堪映照當代美國嘅訟壇生態萬象,鐘意睇律師戲嘅切勿走雞。睇 Saul 拉埋班大學生賣手機拍廣告,手到拿來,見識到 Saul 嘅生意頭腦,又係有睇頭。鐘意睇親情戲嘅,睇 Saul 同佢阿哥 Chuck 兩兄弟相愛相殺,又係目不暇給。要睇愛情?有律政女神 Kim 陪佢發圍陪佢壞。最後金牌,莫過於係 BrBafan 屎至愛嘅 Mike 同Gus,由相遇到相知到合作無間夾手夾腳砌出個冰毒帝國,大把燒腦權謀嘢你睇。用一套劇一個律師仔嘅發圍故事可以講咁多,仲要講得有紋有路,係咪有睇頭?係咪抵睇?

講到咁好,但好似香港範圍內討論唔多,得連登有零星嘅 post;而身邊聽過下嘅人,更係十隻手指數得晒。有耐性睇到呢度嘅,不妨俾機會自己親身感受下咁。Bcs 出到屍身 five,Netflix 有得睇;可以由 Bcs 屍身溫睇起,或者想個體驗再 jeng 啲,睇完 BrBa 再睇 Bcs 又得。開頭睇落會唔慣,但慣左個節奏,就會慢慢 feel 到佢嘅魅力,繼而中晒毒(好似我咁),有幾多人一出世就識欣賞鳳爪同魚雲先?試完唔中意係一回事,問題係,話唔定你會愛上呢。反正大家大把時間,係唔係要 try try 佢先?

(作者自我簡介:躺著觀影,坐著打字。)

廣告

 

廣告

發表意見