立場新聞 Stand News

教學的空間(十三)班主任課篇:復和

2020/8/31 — 15:42

資料圖片,來源:Andreas Fickl @ Pexels

資料圖片,來源:Andreas Fickl @ Pexels

【文:霍梓楠 @ 教育工作關注組】

每年放暑假前的最後一「課」(其實只是處理最後的班務:檢查成績表簽名、收集訂書單……),我都會鼓勵他們想想今個學年、甚至是上年、甚至是小學……有沒有絕交/被絕交過,或者有甚麼爭執、誤會未解決。如果有,可以考慮鼓起勇氣主動聯絡對方,看看有沒有復和的可能。

今年最後一課的中二班主任課只能以網課進行,不過我也嘗試做到這個效果……

廣告

「派成績表之前(按:即我按下「SEND」掣寄出成績表電郵之前!),我有啲嘢要講咗先,如果派咗畀你哋,你哋就唔會理我啦!我要訪問番呢段停課期間,上網課畀過我鬧嘅 A 同學。A 同學喺唔喺度?」

「係。」

廣告

「雖然之後嗰堂你都解釋過畀我聽,我都畀咗機會你等我加番你『印象分』。不過我而家想訪問番你,我發火嗰時你嘅反應係點?」

「驚囉!我覺得你根本唔想聽我解釋。」

你其實知唔知我㷫啲乜?

「嗯!因為我當時覺得你點樣解釋都解唔通。你其實知唔知我㷫啲乜?」

「我知。你朝早嗰堂解釋咗嘅嘢,隔咗幾堂之後,你問中我,我答嘅嘢,錯嘅地方同你講嘅一模一樣(按:當日有兩堂數學但不是連堂)。」

「係,你好似根本冇聽過我之前嗰堂講嘅嘢。仲有,我朝早嗰堂講嘅嘢已經係一早畀你哋嘅筆記寫得好清楚,所以朝早嗰堂講嘅嘢其實已經係重溫。點知你仲係要錯同一個概念。你話係咪抵鬧吖?」

「係嘅!」

「我當時嘅判斷係,就係你冇聽,錯咗唔去改番,仲要唔係隔日,係兩三個鐘之前講過嘅嘢!以我對你嘅理解,你邊會咁冇記性吖?我嗰時覺得你所有解釋都只會係掩飾囉!

你第二日嘅解釋我記得嘅,你話:啱啱轉堂,第一條問題就問中我,我啱啱攞啲嘢出嚟,咪照住我之前做落嘅步驟答你囉。咁其實我仲係有疑問嘅:既然朝早嗰堂已經講呢樣嘢講咗起碼十分鐘,你唔係好應該做咗改正,即刻寫低自己錯啲乜咩?你攞起份嘢就答我,即係似乎未知自己有錯啦!」

「係嘅!我明嘅!」

咁你其實嗰時點解會驚?

「其他同學,我知你哋好心急想快啲睇成績表,覺得呢啲係我同 A 同學嘅『恩怨』你哋冇必要聽!錯!而家我埋緊伏線,係『劇本』一部份!大家要繼續留心聽喔!我問番 A 同學,咁你其實嗰時點解會驚?其實我哋隔住個 mon,你同我都冇開 cam,我鬧你又唔痛嘅!」

「er……總之你好惡啦!我好想講番點解但係你係咁話『完全唔合理』,我都唔敢再講啦!」

「咁似乎上網課,我嘅霸氣都冇消失到!好彩我哋係上學期已經互相了解咗,知我『厲害』唔敢亂嚟啦,哈哈!我諗我而家可以放心講,呢段停課期間,你哋嘅表現都算係咁啦,功課都叫交得齊,上堂都有問有答,雖然我都知有同學會畀我問到好驚,咁你哋驚先會認真答吖嘛!有老師問我你哋上堂點,你估我點答呢?梗係唔會話好,我只會話正常啦,費事佢地妒忌嘛!哈哈哈!!

(可惜睇唔到佢地反白眼、噓聲、囧樣……)

唔該哂 A 同學嘅示範。好彩我鬧著個唔怕醜、唔太記仇嘅……其實你係咪咁㗎?呵呵!所以我而家可以當住全班面示範點樣化解誤會。嗯,而家入最後一個正題,就係:你哋呢幾日諗下,今個學年、甚至喺上年、喺小學,有冇同朋友絕交或者被絕交過,或者有過乜嘢爭執、誤會未解決呢?

唔奶嘢又點會學到嘢呢?

如果你哋記得嘅話,我上學期講過,其實大家仲係細個,青春期荷爾蒙分泌旺盛(中一科學學過啦!),會衝動、唔成熟,好正常,我會鬧你哋啲衰嘢但係之後多數都會氹番,因為知道大家都係學緊嘢。唔奶嘢又點會學到嘢呢?乜都識就唔駛喺度讀書啦!

除非真係有啲事 hurt 得太過份太緊要,仲未好 ready 去面對,咁就唔好勉強;如果唔係,不如試下主動聯絡對方,睇下有冇得原諒啦!不過所謂原諒並唔係一句原諒咁簡單喎,應該好似頭先我同 A 同學嘅對話咁,講番各自所理解嘅版本與事實,然後睇下有冇嘢做到可以補救番個傷害。可能鬧交嗰時會有保留、扭曲事實等,不過而家過咗一排,都盡量真誠面對番過往唔成熟嘅自己啦!互相理解過後,都可以反思自己嘅缺點,更了解自己喺別人眼中嘅印象,都係一個學習契機。

我覺得,大家仲係學生,如果只係因為雙方都未學識人情世故、設身處地而嬲一個人成世,咁有啲可惜囉!而家科技發達,send 個 IG、WhatsApp message 應該唔太尷尬啩?之後仲有咁多年對住,當然唔一定要 friend,但都唔好面阻阻啦!講真,呢啲嘢大人都未必做得好好,你哋唔駛對仲細嘅自己咁 harsh。當然,你哋離開學校出咗社會,面對嘅係另一個世界,我知道你哋今年應該都好有感受……所以呢,大家要珍惜喺學校撞板嘅機會啦 — 當然唔好犯啲明知係離譜嘅錯啦!

好啦,講完!我而家 click 個 send 掣,大家 check email。」


後記:

如果教學沒有空間,教師沒有可能發揮專業能力,教學只會淪為可被任何人取代的工作。不過,「空間」不僅是制度賦予,也需要教師自行發掘。事實上,外間的「限制」有時反而會拓展到空間,讓師生共同發揮小宇宙;反之,有空間卻不懂利用,反而使教學漫無目的,浪費師生共同創造珍貴學習經歷的機會。

本系列是我給自己的暑期功課 — 檢視曾經運用過的空間,雖然有失敗也有成功,但可以肯定的,是只要是人與人之間的交流,就會有令人期待的可能性。

隨著經驗慢慢累積,備課重點由初入職時苦惱如何以教學內容填塞課時,到現在應該在哪裡製造機會讓學生回應歡呼、哪些課題不用多花時間去講免得浪費時間。這也是一次提醒自己的機會:無論如何,千萬別走回頭路!

 

(完)

發表意見