立場新聞 Stand News

新疆棉風暴後 陳奕迅 IG 刪剩 3 帖文 疑暗示「我不如唱歌好好拍電影」

2021/4/16 — 12:46

「你當我是浮誇吧~誇張只因我很怕~似木頭~似石頭的話~得到注意嗎~~~」此乃大叔我嘅唱K、沖涼飲歌,但新疆棉事件後,冇心情唱了。事隔數週,陳奕迅又再成為網民熱話,事源佢近日將 Instagram 刪剩 3 個 post,分別是:新人曾比特的歌曲《我不如》、一隻「SM7b」錄音咪以及文念中執導的電影《好好拍電影》,有人將三個貼文解讀成「我不如唱歌好好拍電影」,暗示不理政治。

Well,你不搞政治,政治也會搞你,今時今日都唔明?迅仔,要長大啦,睜開眼吧。 

陳奕迅 IG 截圖

陳奕迅 IG 截圖

廣告

先不論刪帖暗示想不理政治是否過分解讀啦,單單撐新疆棉其實已經係政治啦。新疆棉背後係集中營、強迫勞動,迅仔你唔係真係以為只係一舊棉花咁天真啊嘛.....呢幾年有幾多新疆集中營嘅調查報道、集中營受害者訪問,唔係唔知啊嘛?定你都係睇開官媒,覺得 BBC 係假新聞?

廣告

相信唔少香港人見到陳奕迅係新疆棉事件中話要終止 Adidas 代言,又微博發聲明 「堅決抵制任何污名化中國的行為」,都既失望又憤怒,當年冇衝出來做「護旗手」,點知依家做「護棉手」。個人認為後者比前者更難以接受。 

老實講,大叔有一段時間都成日聽陳奕迅,有份 playlist 瘋狂loop,搭車聽,返工聽,瞓前聽,嗰陣仲係太平盛世,我都只係個日日準時返工等收工飲酒嘅港豬。但2019年之後,不知不覺冇咩點聽E臣了,反而聽多咗達明一派,聽《愛在瘟疫蔓延時》,聽《十個救火的少年》,聽《回憶有罪》,聽《天問》。在這壞透的時代,有歌,多好。

大叔一把年紀,但都想努力跟上年輕人嘅腳步,一有機會就會同各位後生仔傾下計。前排個個都講移民,新聞講,朋友聚會都離不開呢個話題,記得嗰期有個後生女share 咗首歌比我,係「陀地歌姬」、「樹妮妮」Serrini 嘅《Let Us Go Then You And I》,佢話佢成日都聽到喊,佢好想譜寫自己嘅未來,繼續去開發新秩序,唔想放棄。

聽完,大叔都眼濕濕了。 

 

 

發表意見