立場新聞 Stand News

泰有人情味

2020/10/14 — 9:52

新既隆姐喺對面,都喺衙前塱道。圖片來源:作者 Facebook

新既隆姐喺對面,都喺衙前塱道。圖片來源:作者 Facebook

細個成日見住有飛機「剷」落去既漢寶酒樓!曾經以為企喺嗰度可以摸到架飛機,但點知幾年前舊既漢寶酒樓一夜之間無左!

到近日,輪到市建局想「剷」起九龍城,將九龍城廣場、啟德道同沙埔道重建。據過往既經歷,市建局極少考慮成個社區氣氛,只係硬塞佢地自認為合適既建築物,無諗過點由「舊」過渡去「新」,決策者任由社區「自生自滅」。似乎成個九龍城好快又會變成歷史中既煙塵。

呢個就係細個比飛機剷落漢寶酒家既經典回憶!可惜已成回憶!圖片來源:作者Facebook

呢個就係細個比飛機剷落漢寶酒家既經典回憶!可惜已成回憶!圖片來源:作者Facebook

廣告

講起九龍城,好多時都會諗起泰國野食,泰式揼骨,泰國小店......就係呢班勤奮既泰國人,令到啟德機場離去後九龍城都繼續精彩。

廣告

由於小編(Local_9up)耐唔耐就會去下針灸,推拿按摩。咁啱就認識左「華姐」。華姐係 80 年初嫁黎香港既泰國華欣「過埠新娘」。佢啱啱黎到香港既時候,成個香港都未係好流行按摩揼骨,但佢地帶起左呢個潮流,好快就有好多泰式按摩出現係九龍城。而咁啱得咁橋,香港經濟起飛,好多做寫字樓既白領朋友都真係成日頸梗膊痛,按摩就好幫到手。華姐主打既係華欣style既按摩方法,坊間比較少見。平時,仲成日見到佢孫仔出現喺按摩院入便同客人玩。佢地已經係好地道既第三代居港泰人。

九龍城當然唔少得泰式美食啦!「隆姐泰國美食館」係第一間落戶九龍城既泰菜館。主持人「隆姐」雖然已經過左身一段時間,但佢當年喺九龍城幫助左好多泰國同胞融入香港。隆姐就係當中既表表姐,好多泰菜師傅當年都係佢既伙記。練成一身「好武功」再開菜館。呢度從來無「所謂教識徒弟無師父」,而係「共存共榮」。呢間餐廳可謂九龍城小泰國既發祥地。隆姐泰國美食館亦都見證住香港美食天堂既全盛時期。曾經好多遊客喺啟德機場一落機就係去九龍城食好野!如果呢班居民因重建而四散,真係此情只待成追憶啦。

一定要食青木瓜沙律同串燒!正宗既青木瓜沙律會有d蝦米喺入便,好多港式既都未必有!圖片來源:作者 Facebook

一定要食青木瓜沙律同串燒!正宗既青木瓜沙律會有d蝦米喺入便,好多港式既都未必有!圖片來源:作者 Facebook

其實近年都仲有好多港泰情緣。佢地就係 About Thai 夫婦。雖然老闆娘黎香港唔係好耐,但佢地對街坊果份感情真係好真摯。九龍城店係佢地當年第一間舖。佢地成日都同埋 BB 一齊睇舖。老闆娘當時仲介紹左我去清邁古城區揼骨,仲要有折比埋我。估唔到喺九龍城小泰國識既人幫我聯繫左係另一地既泰國人,感覺真係好奇妙。呢種咁街坊既聯繫唔係到到都有。

呢間就係About Thai既第一間小店,人情味極濃,成日推介好多正野比街坊。依家全香港好多地方都有分店,希望佢地生意興隆!身體健康!圖片來源:作者 Facebook

呢間就係About Thai既第一間小店,人情味極濃,成日推介好多正野比街坊。依家全香港好多地方都有分店,希望佢地生意興隆!身體健康!圖片來源:作者 Facebook

呢班努力融入香港既泰裔香港人,好多已經去到第二三代,係「小泰國」既中堅份子。泰裔港人好勤力先有今時今日,憑住佢哋日夜勞動雙手、白手興家、自食其力,最終建立咗香港一個咁特別既社區。往時每年都有潑水節,佢哋亦好歡迎香港人一齊黎玩;而好多香港人都專登入去九龍城食泰國菜。與此相對既係,香港地有一班北來人士,只想輕輕鬆鬆打開雙手黎香港拎福利,醫院床位、奶粉、生b攞香港身分證、一萬蚊,然後再加一句「要不是祖國.........」。咁樣只會令原來既居民反感。其實包容並唔係無條件一方接受另一方,社會文化亦唔係只會一方遷就另一方,兩者係雙向關係。當你見到好多九龍城泰國人講廣東話仲好過北來人士,你就知道點解會出現奶茶聯盟,香港人會接納泰國人多啲。

另外,「國際」大都市不停追逐興建外表光鮮亮麗建築物,「舊嘅唔去,新嘅永遠唔會黎」成為執政者、地產商理所當然理由,城市逐漸變得無任何訴說故事既地方,隱形地唔見咗城市一部分,表面風光嘅都市只用消費埋砌,最後變得好多看不見既洞口。

究竟日後九龍城面貌會變成點?有無可能逃過命運詛咒,社區唔會再一刀切,原區居民唔會再四散東西?政府對社區會有完善規劃?

(備注:以上店舖唔喺沙埔道同啟德道既第一期重建計劃上。但係九龍城重建係全盤計劃。可能遲早都拆......)

作者 Facebook

發表意見