立場新聞 Stand News

港產青春劇未斷氣 ──《男排女將》

2020/12/9 — 16:04

男排女將

男排女將

【文:早安娜 Joanna】

唔少人可能同我一樣,見到 Viu TV 呢套劇個名,就自動波聯想到十幾年前 TVB 運動包裝、科幻偶像劇《戀愛自由式》── 點解科幻?大家記唔記得「破冰轉身」同「片石轉身」?或者係咪《當四葉草碰上劍尖時》的男男女女青春玩劍擊。在無任何期望下睇完 11 集,發現原來真心穩打穩扎講打排球。先講明我唔係鄧麗欣同另外幾位主角的粉絲,睇之前連顧定軒都唔識,對排球一竅不通,但我被這 11 集說服,剛剛第 11 集更頗夠薑,用成集時間齋講一場球賽,卻令人離奇感動,異常熱血。

故事到現時為止都扎實求真。選材本身具說服力,有如《點五步》,劇本原型為甲一男排球隊「力臻」,大部分球員身形較矮不被看好,但在女教練葉鳳儀帶領下,數年內由丙組打上甲一的真實故事 ── 即係你當李斯特城贏英超冠軍。故事專心講球隊(起碼頭11集係),集中在如何找教練如何組隊如何訓練如何自強如何團結等主題上,算充分描寫每個人物,起碼無過多偶像劇情節,無品學兼優天才球員點打都贏,或霸道學長虐灰姑娘之類的狗血情節。反之,一場 Stephy 與男友分手戲,簡單行個天橋就交代完畢,節省篇幅,扣緊球隊主題,同時委婉又寫實 ── 講真而家個個分手都要去碼頭飲酒街頭罵街落大雨再出車禍咩。

廣告

選角上,曾是港青排球隊的 Stephy 可謂不二之選,加上曾打甲一的 Ian 及跟過隊的顧定軒,又係一個穩打基礎。演技上,可能很多人依然把 Stephy 停留了十幾年前與港版活地亞倫作品劃上等號,就對劇集卻步,well其實你我都會進步的(大家都睇睇自己 2000 年張相咩樣),特別一提 Stephy 劇中簡約服裝造型及清淡化妝真為角色加分不少。其餘主角都表演不錯,大部分都能演出堅定與青春感,特別顧定軒的角色為團隊實力擔當,永不放棄零瑕疵的性格,容易令角色變得腦殘或「神化」令人反感,但表現能取得平衡。當然,我無盲,部份演員的演技還有進步空間,但整體算勝預期。

言歸正傳,球隊從打丙組第一場就輸波,決心用一年時間訓練捲土重來,第 11 集正是講這一場從丙組能否升班的關鍵賽事。從賽前策略調整到球員在場上的心態變化,到團隊的兄弟情愫,以至球賽情節鋪排及情緒過度,最後獲取冠軍的感動,都一盡展現。即使演技及劇本(特別是球場內的對話)有改善空間,其中幾個片段卻突然勾起我當年睇《男兒當入樽》的影像,那份熱血一下上腦(當然我更愛湘北櫻木花道)。

廣告

上星期谷德昭為《全民造星 3》做評判,為一唱跳表演講評時提到:「見外國人地有 D 咁嘅 artist,原來我香港都有,咁我就放心 D!」

其實,不只artist,很多台前幕後的很多,一直都,未斷氣。

(作者簡介:IG: morningjoanna, FB: Joanna 早安娜)

發表意見