立場新聞 Stand News

《無限斜棟有限公司》— 有啲嘢只係香港人先寫得出

2021/5/2 — 11:16

《無限斜棟有限公司》

《無限斜棟有限公司》

【文:Dylan】

《無限斜棟有限公司》終於完咗,睇完結局之後眼見大部份嘅風評都係麻麻地,其實我就覺得真係唔差,尤其原本頭十五集真係睇得算幾開心,可惜嘅係去到結局篇幾集就有少少出事。

編劇同煮餸一樣,好多時你有好多嘅配料擺到喺你面前整,就當係枝竹豆腐火腩煲先算,你舊豆腐可以整到金褸佛衣咁靚,仲要唔會臭,你啲枝竹可以真係用最靚嘅豆膜整出嚟,你個汁可以係唔知有咩秘製方法調出嚟,但唔好為咗整呢堆嘢而最後唔記得咗整啲火腩,對我嚟講今次《斜棟》就係咁。

廣告

今次前十五集其實真係寫得非常好,每個故事入面都有好多你意想唔到嘅plot twist,而且好多集數啲演員都做得好好,例如沈殷怡表現就幾亮眼,但去到莫梓蕊嗰集就開始見到編劇嘅弱點。

成套劇最弱嘅部份就係言情,例如有啲人就話Rocky係嗰部份嘅敗筆,但我覺得佢算係做得幾稱職,但最大嘅問題係佢嘅人物感情描寫唔夠立體。本身莫梓蕊個角色自己嘅推進係夠,角色的確係有變化,但其實感情應該係(最少)兩個人嘅事,對於Rocky嘅描寫係近乎零咁滯。其實劇情最後嘅反轉的確講得通,意念都唔錯,但係Rocky係毫無先兆地改變,就會令到觀眾睇落好突兀。

廣告

故事邏輯上講得通、解得通畀觀眾聽、觀眾理解得舒服而接受係三個層次嚟,所謂「眼高手低」不過如此,有時候唔一定話要用啲好老土嘅flashback去講,用多一兩個鏡頭去講故事可能已經好夠,今次套劇喺呢方面亦都係好弱。

莫梓蕊嗰一集嘅言情對白已經有少少尷尬,同情地理解我可以當係角色設定,莫梓蕊毒少少唔識講感情,所以會講「請你好好討壓我」呢類對白,但去到三角關係篇嗰度嘅仲係咁就會變咗災難級。

當陳家晞最後五集都只係識講自己唔識揀,就會令到呢個角色越嚟越唔令人討好;張諾恆好似每次去到講感情嘅時候,情商同智商都好似變咗十歲細路咁,好彩本身陳卓賢對鏡夠自然同個人魅力夠,如果唔係真係會想車巴佢;李展翹每次都係媾女嘅方式都係勁老土,送傳家之寶呢啲情節真係唐滌生先寫得出,我明白係想突出返佢個角色性格,但既然角色本身劇情推進之下性格都已經有轉變,點解媾女又唔識變呢,好彩係himmy夠魅力同埋演技幾好;兩個男人鬧交一開始都會覺得啲對白幾好笑,鬧多咗而次次都係鬧同一樣嘢就會開始悶,同埋只會覺得佢兩個小學雞。

臨尾呢五集入面,三個角色發展都係停滯不前,用麗馨同強哥兩個例子去做襯托家晞點樣去選擇,成個idea係好,但睇完之後三個人都係冇任何角色上面嘅心理變化,就變相嘥咗個舖墊。尤其係佢呀媽嗰幾集真係睇到好辛苦,呀媽出嚟完全冇令到家晞有任何變化,剩係睇佢哋兩母女互相指責,咁點解要專登攞出嚟做一集?喺劇情上面編劇算係做得唔錯,但人物刻畫上面就真係差咁啲,尤其如果言情劇人物唔好睇,就真係唔知睇啲咩。

最後一定要講嘅就係結局,攞番一開始嗰啲角色出嚟係幾有心思,但又係同一個問題,完全冇舖墊之下話呢個人係兇手,最好笑就係搵晒啲人出嚟assemble,但係其實佢哋做嘅嘢係完全冇用,畀人感覺成件事就係為做而做。如果一套劇個敗筆係喺條主線度,前菜整得幾好都係會令觀眾失望。

好似彈咗好多嘢咁,但的確頭十五集係睇得幾開心,整體結構上係唔錯,前半part單元式劇情骨架更加係水準之上,但如果大結構上執少少,例如將三人行嗰part cut半集,早啲搵呀媽出嚟,然後將母女劇情拆散做日常攝喺單元中間而唔係專登做一集,將多出嚟嘅時間改為舖靚啲個結局,就會令到成個結局篇好睇好多。至於對白、人物描寫同鏡頭運用嚟講,就真係靠經驗累積番嚟,喜劇節奏編劇係拿捏得得心應手,但情情塔塔嗰方面就尚待進步。

好開心見到港劇有越嚟越多年輕編劇落手做,製作組又肯畀佢哋全權自己負責做。只要viu肯繼續用,編劇們肯繼續寫,我哋就肯繼續睇,我唔介意有少少瑕疵,希望你哋都唔好介意有啲負面評價。任何香港人寫畀香港人睇嘅劇,就叫做港劇,因為有啲嘢只係香港人先寫得出,得香港人先會明,香港嘅文化傳承就靠晒你哋。

作者 Facebook

 

發表意見