無賴

資料圖片,來源:Andre Hunter @ Unsplash

積壓多時的工作壓力來自一位越來越難相處的客戶,所有同事叫哂救命。

正當每人都忙於如何把這個客戶的問題逐點擊破,有位只是負責後勤工作的女同事突然爆了一句「解鈴還需繫鈴人」,令到各位同事如夢初醒。

其實我們知道這位客戶「越來越難相處」的理由源於何事,只是我們覺得太難解決,不想面對。

與其費力處理一百個問題,倒不如集中火力解決一個問題,因為那一個問題,正是千千萬萬問題的根源。

停一停,

有時,問題好像衝著我們而來,而我們可能從未思考過,問題會否在於我們自己。

就好像那個三號風球的早上,我在某酒店門外等的士,附近有個男人正在跟酒店的代客泊車哥哥熱烈爭辯。

「你哋呢度明明寫住,」他指著手上的泊車飛說,「最低消費一百八十蚊,咁我而家消費兩百蚊都過埋,你都唔畀免費泊車我?」

聞所未聞,香港有哪一家六星級酒店是一百八十蚊消費就給你免費泊車呢?

「唔好意思先生,」泊車哥哥面有難色,反轉那張泊車飛說,「呢度寫住要喺酒店消費滿八百蚊先有兩小時免費泊車。」

「你自己睇下,」男人再反轉那張泊車飛說,「前面明明寫住最低消費 $180。」

「其實係咁嘅先生,」泊車哥哥又反轉那張泊車飛說,「呢度寫住如果喺酒店消費唔夠八百蚊,就要畀九十蚊一個鐘頭嘅泊車費,但最起碼要畀兩個鐘頭,即係最低消費一百八十,而最低消費一百八十蚊就係咁嘅意思。」

你估個男人之後講咗邊三個字?冇錯,就係無賴最鍾意講嘅 —「我唔理!」

「我唔理,你哋寫到唔清唔楚,係你哋問題。」

之後結果怎樣,因為我上了的士,不得而知,但我相信酒店最後都是要屈服的,因為無賴就是六星級酒店的永恆宿敵。

塵世間最無賴的無賴又是誰人?那個仍然是三號風球的夜晚,竟然得到答案。

是夜,我與一位叫「雪姨」的女士在某家頗有情調的餐廳晚飯。

皮膚晶瑩剔透,原來她是個有二十七萬 subscribers 的 YouTuber。

每次我為她倒酒,她說 thank you 的時候,雙方眼神碰個正著,總有點觸電的感覺。

一頓飯,有 Haut Brion,有紅蝦意粉,也有雪姨的傳奇故事。貧困的單親家庭長大,今時今日可以一炮過千萬首期置業,她說當中沒有辛酸,別人眼中艱苦的挑戰,於她而言是很好玩的磨練。

「我一啲都唔叻,距離一個叻字我有好遠距離。」

有故事的人就是這樣子的,就算你表現到多麼謙卑,你的自信還是讓人如痴如醉。

離開餐廳的時候,在她後面兩步,頭髮的香氣撲鼻而來。「講咗成晚,你都冇講畀我聽,有啲乜嘢係人冇你有,而令到你咁成功,我哋可唔可以搵個地方,傾埋下半場?」

「傻啦,」她笑著說,「人冇我有?唔覺喎,人有我冇,反而諗到。」

「Really?例如呢?」

「無賴,」她說。

好多人心裏面都有個無賴。

呢個無賴會同你講,你唔成功,唔關你事,係其他人好彩,係其他人用卑鄙手段,係其他人唔要尊嚴。呢個無賴最無賴,就係見到人哋成功,唔單止唔會叫你反省,仲會叫你翹埋雙手睇吓人哋幾時死。

受教了。

性格決定命運,判你死刑的往往是你自己的思考角度。

別人的成功沒有理由,自己的失敗總有藉口,塵世間最無賴的無賴不是別人,而是自己。

 

作者 Facebook

相關文章

    發表意見