煮送嘅嘢人人都識條鐵（二）： Seafood Risotto 海鮮燴意大利飯

即係就咁嘅… 正宗嘅risotto呢， 其實的米嘅中間心應該係僅生的，不過呢，呢種半粉筆嘅口感就唔係人人中意的， 所以意大利以外 (包括澳洲呢度嘅人) 其實通常都會將的米煮到全熟的。

之但係又咁喎， 正宗煮得好嘅risotto係僅生米， 留意係 “僅生”， 唔係 “半生”， 半生就真係太生喇， 而僅生係一個好高嘅境界， 咬落去應該係只有 a hint of 粉筆， 而唔係釀粉筆， ok？

其實好容易煮嘅！

咁有咩材料呢:

米(Arborio rice)            1杯

洋葱                    1個

酒                  1/3杯

海鮮(魚/蝦/尤魚etc.)        500G或者有咁多得咁多

牛油                    50g + 50g (即好明顯係分開兩份啦)

蒜蓉 (乾濕都得)         2湯匙

蔬菜(合時就得   )           500G

海鮮湯                  1公升

熱水                    約2公升

Cheese  (最好係Parmesan)       隨你中意

咁樣煮嘅(其實好簡單架咋)：

蔬菜洋葱切粒

鑊落牛油， 落洋葱(可以落埋蔬菜)

落米

炒下佢

落酒

撩下佢

落海鮮湯

撩

如果落晒海鮮湯， 應該已經夠鹹， 就改落水

不斷撩

重複6-10

海鮮另外起鑊用牛油同蒜蓉煎熟

有幾樣嘢要講：

香港嘅海鮮應該又鮮又平嘅， 唔似得澳洲呢度咁貴 (仲要頂你急凍嘅)， 你地可以隨心揀。

咁其實唔係真係有十幾個步驟嘅， 只不過係落料、撩、料、再撩咁樣不斷重複直至米熟 (OR你要好Italian嘅就僅熟囉)。

如果你唔想另外煮的蒜蓉海鮮， 其實你一次落晒去撩都得嘅， 不過我就唔中意咁樣因為海鮮會容易煮到好老， 同埋我中意蒜蓉牛油味煎過嘅海鮮。

咁risotto就煮到濕濕地， 又唔好太水， 幾creamy咁就得架喇， 而唔太水個秘訣就係不停咁撩佢， 因為咁樣的米嘅starch就會撩左出來， 咁的海鮮湯/水就會杰喇。

Cheese隨你喜歡落幾多， 一般來講就用Parmesan， 先有risotto果種香味， 我今次其實無落。

當然如果你用新鮮海鮮煮個海鮮湯再用來煮個飯， 咁出來飯底個味會更鮮， 我只係懶先用盒裝湯， 海鮮高湯通常用蝦頭/蝦殼/龍蝦頭/殼煮出來係最鮮甜好味嘅。

專頁留言hi我