立場新聞 Stand News

睇完屈穎妍鬧 Error,真係好想 ...

2021/5/19 — 14:16

圖片來源:《error自肥企画》片段截圖

圖片來源:《error自肥企画》片段截圖

睇完屈穎妍鬧《Error 自肥企画》篇嘢
真係好想一個死亡行星 Ban 埋佢度。

寫篇評論話人之前,
睇多人地幾集先,
唔好以偏概全,
係評論人基本中嘅基本。

嗰篇喺《大公報》發表嘅「真人騷的禮崩樂壞」,
結尾如此總結:
「免費電視頻道之所以是免費,
就是希望你能為社會提供一點教化、
一點正能量、一點價值教育。
如果,免費電視頻道都充斥色情低俗節目,
香港的禮崩樂壞,已是欲救無從了。」

廣告

今個星期兩集《自肥》,
簡直係正能量爆標之作,
係睇到人標眼淚嘅最佳價值教育。

Mike 導團隊辛酸嘅背後花絮,
教化人點樣喺資源缺乏下,
以有限創造無限,
用堅持同努力去做到最好。

廣告

保錡特訓後演出再真情剖白嗰段,
我噚晚加今朝睇咗三次,
三次都睇到眼濕濕。
一個未盡完美嘅後生仔,
犯過錯後明顯有點驚弓之鳥,
連自肥 Item 都唔敢主動提出。
而天才熱血嘅製作組為佢精心安排,
學習三種新技藝,
讓觀眾見証佢用努力轟出陰霾,
睇到一個從錯誤中成長嘅年青藝人。
保錡獨白中,
喊住多謝創作團隊,
嗰份真誠同熱血嘅溫度,
老老實實,
真係用北極冰川雪藏住佢都應該融。
對比隔籬台嘅藝人出事,
分分鐘立即割蓆,
呢個唔得下個馬上補上。
反之 ViuTV 團隊,
卻團結一致去扶番自己隊友起身,
呢啲唔係價值教育?
唔通講阿 Sir 去邪骨冇犯法係呀?

仲有,
妳呢啲寫評論說三道四嘅,
係得個講字,
人地 Error 加無制限 OT 編集団嘅正能量教育,
係瞓身做俾人睇,
呢啲叫做身教,
係上一代開口埋口成日話好重要嘅,
依家新一代就完美示範一次。

整你個掣,
我好少咁激動,
平時落筆永遠就住就住。
但呢啲咁嘅人,
真係後生鍾意乜佢就屌乜,
又睇啲唔睇啲,
執住一兩幕脫毛彈 JJ 淫褻前猥瑣後鬧鬧鬧。

放心,
我之後寫文,
會變返平時斯文啲,
唔多話人淨係讚人嘅我。

Bear with me,
發洩一次咁多,
我個腦幻想緊,
將個死亡行星拉到彌敦道咁長,
一嘢車埋佢個烏鴉嘴度。
咁會唔會太暴力?
應該唔會,
一定冇石 Sir 曾建議嗰種「買水喉通打仔」咁暴力。
 

《立場新聞》相關報導:〈轟《Error 自肥企画》淫褻意識不良 屈穎妍:難道通訊局都無權過問?〉
ViuTV《Error 自肥企画》

(標題為編輯所擬)

作者 Facebook

發表意見