認真地 Cosplay
徐俊文2016/9/27 — 12:10
徐緣、徐錦江、曾江、杜小喬
第一次開齋為商業品牌賣廣告，源於 SK Lam 幾個月前一個電話。
「老友，有樣嘢幾好玩，有冇興趣玩埋一份？係有關 Playstation VR 嘅一個廣告。」
我之前推過唔少商業廣告邀請，因為自己做營銷呢一行，好明白形象管理嘅重要，以往守身如玉，直至俾 SK Lam 一條癲橋吸引到：
「VR 講求令人進入一個幻想世界，所以我地呢次廣告索性搵班名人玩 Cosplay，扮演動漫遊戲人物，FF 到極限。」
「俾啲例子嚟。」我當時揸緊車，開 Speaker Phone 問呢個問題。
「我地搵咗盛智民扮佛地魔，佢應承咗。依家傾緊王維基扮笛子魔童，但唔知佢會唔會忙選舉。」SK 笑住講。
「WTF！咁癲！」我差啲撞到前面架 Audi！
「老哥，有個漫畫人物，我地條 Team 一致認為，要 Cosplay 呢個角色，一定要搵你。簡真度身訂造一樣，你估唔估到係邊個？」
度身訂造？我心諗，SK Lam 你扮一拳超人，就度身訂造。
就係因為諗起 SK 個頭，我突然諗到⋯⋯
「喂，你唔係睇中我頭髮執純天然白毛，叫我扮怪醫秦博士吓嘛？」
「Exact7ly！！！」
就係咁，我人生嘅第一次商業廣告，就咁俾咗 AllRightsReserved 嘅一拳超人琦玉君。借此感謝造型師 Sean K、日籍髮型師 Ryoji Imaizumi、化妝師 Angus Lee、同攝影師 Rex Tsui，為 Cosplay 加入現代感，創造出不一樣嘅「怪醫徐博士」。
整輯相我個人認為最有驚喜嘅，係搵曾江扮赤目司令。
我諗唯一可以擊敗曾江嘅，只有搵梁美芬扮技蘭。
