立場新聞 Stand News

論大灣區最佳電影 — 《金都》

2020/6/24 — 13:18

電影《金都》劇照

電影《金都》劇照

【文:郭安】

近日好多爭議嘅《金都》,其實係好野!凡愛国愛港人士,必看精選!

好多人講大灣區電影,淨係識《過春天》。因為夠典型!擺明係大陸導演、大陸視角、大陸空間(中港通)。充滿一股大陸主義味(香港都係黃賭毒集中地,停留喺八十年代旺角卡門時代,同大陸聖潔化反貪完全相反嘅情意結,因而產生一種特殊嘅吸引力和陌生化效果。)

廣告

乜春「大灣區電影」?講白D,電影拍攝香港,但係唔似香港人嘅香港,係大陸人嘅香港!迎合大灣區發展的思想準備。

不過《過春天》太明顯想做大灣區電影,畫虎不成反類犬!

廣告

《金都》成功太多了!

成齣戲一句講晒,褒大陸貶香港。

㨂選全社會最卑賤嘅港男廢男做攻擊對象,自然無人敢幫拖。大陸男由外型、談吐、穿著、品味、家底,樣樣贏晒班港燦九條街!聰明嘅編導,匿喺女性主義嘅安全服飾下,個個港豬當佢係手足,成功做咗便衣,比同係女性導演嘅白雪(又掛委任證又著制服)聰明太多。

編導有學院嘅基本劇本訓練,無疑識得寫下D廣東話對白,大家見低俗就高興到牛歡喜一樣。但係諗深一層,部戲比《過春天》更有抺黑香港,愛國洗腦功能,直情係国安法新時代中小學指定教材電影,真正嘅愛国時代產物。

如果用港女手足思維,部戲唔Work。港女會明白今日D樓咁貴,正常男仔(即使律師、醫生)都唔可以直接買樓,最少要父母一代支持首期。所以戲中女主角對有母親支持買樓嘅港男投以鄙視目光,第一奇怪!(所有香港人都知道,買唔起樓問題係政府政策,而唔係香港男人問題。)

自小喺香港長大嘅港女,一早明白香港地小人多(或香港地,小人多)。今日連政府都同你玩劏房,港男在母親支持下買到樓,其實間屋有房有廳有廁所(比劏房大),女主角竟然嫌三嫌四,好委屈樣子(再加上對香港外母的典型醜化,令委屈程度更具體!令香港形象更醜化。)相對大陸仔有間好大嘅屋,仲有露台。一比之下,港男更令人憎恨。(諗深一層)如果唔係大陸視野,點會嫌香港住屋太細嘅問題,怪到落港男身上?第二奇怪!

女主角為咗離家出走,貪錢而假結婚。呢個物質化嘅港女,一見大陸仔,同準老公港男天差地遠,對大陸仔有傾慕之情,竟然覺得大陸仔踎起地都有型!女主角仲要努力向国家學習,摒棄香港文化,終於能夠喺大陸仔面前「跪低」,表現踎地技術,仲一副小學雞「我都做得到」嘅自滿表情。港女咁有性格,會唔會做呢D行為?第三奇怪!如果行多步,女主角應該學殘體字,學吐痰。(呢個係編導聰明嘅地方,做得太明白,香港觀眾就看穿了!只有深諳国情嘅郭安,先明白呢部戲好野嘅地方!)講到軟性洗腦,《過春天》真係輸九條街!

此外,女主角好矛盾。如果話女主角好憎老豆,為咗離家出走,唔係純為錢,咁就唔會因為外母一句話要結婚,竟然打電話去懇請憎恨成世多年不聞不見嘅老豆。(一係條橋本身唔通,一係女主角唔係好憎個老豆。)咁如果你話佢當年假結婚貪錢,個女主角唔要同港男結婚,最需要錢嘅時候,竟然用九分之一篇幅,描述女主角山長水遠千里冒險(帶過多現金過關,唔知有無犯法?)送錢(舊錢前面用咗大量篇幅講女主角點樣小心保護,不讓準老公發現,又不放入銀行,成為故事非常重要的道具)俾個唔關事嘅大陸仔,祝佢一家幸福快樂。(呢個唔似一般港女性格行為。已經超越貪錢不貪錢嘅地步,特別喺佢講獨立最需要錢嘅時候,一個無特別專業兼離家獨派,身處香港物質生活水平全球最高嘅社會)你認為合理嗎?第四奇怪。

這種奇怪仲牽涉一種奇怪嘅感情,照說大陸仔同港男比拼,高下立見,仲要準老公明知嘅情況下,結婚前仲堅持單身跟(充滿誘惑嘅)大陸男孤男寡女過一夜,女主角選大陸男,一起赴美,放棄香港,合情合理。(編導聰明嘅地方來了!)半路殺一條老套好男人橋段,打開門有個大肚女友箍煲,大陸男一見到前度個肚,立即負起責任,同前度女友破鏡重圓,仲要結婚,美國都唔去。(條橋極唔合理!不論被飛大肚女友見前度帶個女人返屋企嘅反應,不惜一切要孤男寡女共渡一夜嘅女主角發現金屋藏另一嬌嘅反應,到大陸男發現分手無見一排忽然大肚叫你認數嘅反應,這樣又爛又舊又險又臭嘅橋段都要用,主要避免穿了真正內心想法:「愛大陸,棄香港」嘅潛內容。)唯一能夠合理解釋女角行為,是為了教育觀眾什麼是「共產」觀念。香港人無論如何貪錢,無論你用什麼方法,出賣道德,欺上瞞下,巧取豪奪,死慳死抵,最後都要學習如何將所有積蓄,奉獻国家。愛大陸,甚於父親; 愛大陸,甚於丈夫;愛大陸,甚於自己。(我看到這一幕,在黑暗的戲院中忍不著激動地流淚。心裡就想着国家!歌頌一国兩制嘅偉大!)

查實最後,最重要亦最大嘅奇怪係,女主角嘅身份。女主角找最港女Stephy,令觀眾一看便投入是港女。但係故事最重要係女主角嘅成長背景,電影只用一通有聲無畫嘅父親電話交代,留下極大嘅一片空白,顯得故事不合理地殘缺。其實女主角一D都唔港女。今時今日後服務業為主嘅香港,女性賺錢能力往往較強,好多時港女港男合力供樓,先係好獨立嘅香港女性思想。反而一味怪男人無本事,養唔起頭家,呢D係咩人?女主角不是港女,其實係港女外,大陸女內。換了大陸女主角,成個故仔通晒。只有大陸來香港嘅女人,先會對於香港空間嘅失望,先會對香港男人無本事成家要靠老母俾錢買樓而憤怒,先會見到金都嘅香港結婚模式而鄙視,先會對香港由外母到準老公到佢身邊朋友都充滿一種地域或其他更嚴重嘅人種仇恨。喺《金都》嘅世界,只要係大陸就好!只要係大陸,所有嘅人同文化都係美好。即使隨街踎,都比港男打機個樣有型。只要係大陸,咩都係好嘅。只要係香港,咩都係壞嘅。

《金都》能夠用最貼地嘅香港地道方言,香港最熟悉嘅空間(其實暗藏中港通,只是《過春天》帶了委任證,《金都》是聰明便衣!),塑造一層充滿香港本土糖衣嘅大灣區電影。大灣區電影有兩種的,一種是大陸人打着旗幟拍的,另一種是香港人用「無間道」臥底精神自動獻身拍的。

我鼓勵所有支持国安法,支持大灣區電影嘅香港導演,努力向《金都》學習。《金都》為今後嘅「香港電影」,定下了最佳的典範。所有反對這部電影嘅,都係我們嘅敵人!大家要保護《金都》,鼓勵大家學習愛国熱情,為迎接新香港,萬歲!

 

(作者簡介:愛国電影評論人)

 

發表意見