立場新聞 Stand News

【讀書報告】《攻關》

2019/12/7 — 14:07

葉朗程《攻關》

葉朗程《攻關》

我識得好幾個 I Banker,無一個靚仔、冚唪唥唔有型,雖則男人唔一定要靚仔有型但起碼要有格,但唔係衰衰格格無乜頭髮,莫講話唔似 IFC 張智霖,頂哂籠係交易廣場阮兆祥!

但原來葉朗程話佢唔係 I Banker 係 Private Banker,又其實佢亦未必真係 Private Banker(九成唔係!),正如穿 Kenzo 的女人係鄧小宇,原振俠衛斯理係倪匡,王迪詩並唔係律師,原復生、余就風、孔少林係蔡東豪一樣,角色扮演其來有自,重點係文章好睇唔好睇,睇完發人深省定悶到膽戰心驚。而葉生啲文章的確㜺鬼嗓核又好睇!

我懷疑過葉生係一個人定一班人,因為佢有時寫嘅嘢文筆眼界好大落差,但一位知名作家朋友再三力證佢係一個人,而我選擇相信佢,雖然好多人懷疑葉生係某位徐生,but I don’t think so!我亦懷疑過葉生口中嘅知遇恩師蔡生其實即係葉生,但蔡生又好似比較 rational 無咁感性浪漫,而且我問過葉生見過好讚賞嘅 Lab Made 老闆 Ronnie Cheng,佢又話葉生唔係蔡生,而且無我咁高大靚仔(我有理由相信佢講笑,但我選擇相信佢認真!嘿嘿!)我又懷疑過佢係方卓如即係龔耀輝,文筆有啲相似但又無咁細膩感性,所以葉生係乜水依然神秘!但唔知有唔知好,事關葉生形容自己六呎昂藏玉樹臨風,點知真人係五短身材鼓埋泡腮的話,真係乜嘢聯想都太監日光浴,無 L 哂!

廣告

唔記得幾時開始睇葉朗程,但肯定係「炫耀」同「B 餐 C 餐」之前,佢厲害在 project 離地身份(IFC 張智霖喎!)寫貼地話題,講女人論世事說感情談瑣事,即使你七餐一宿存款充足還是迫地鐵返工住緊公屋,都可以令你有所共鳴!

呢本書裡面嘅文章其實係嚟自葉生嘅專欄輯錄而成,我大部份甚至全部都睇過,但由頭睇多次都依然覺得幾好睇,有佳句有佳章!至於葉生係咪真係 banker,係咪真係墳場姑爺仔,係咪真係有 Danielle 係咪真係有過 BB,甚至係咪華仁仔係咪有黑咭,其實唔重要,作家作家,作作加加嘛,麻甩之神蔡瀾先生話嘅!但睇葉生文字你會 feel 到佢有 taste,例如佢寫著西裝嗰幾篇,係 Sale-si 定係公子,唔使睇出世紙,活現於文字!

廣告

實有人話,妖,你條不學無術嘅廣告人品評葉朗程?憑乜?其實使鬼憑乜,你睇得書多見得個世界多,可以我手寫我心咪吹下水囉,不喜咪插喎!

但最大最大嘅評語係,大佬下次啲字印大少少吖,10 point 字我哋啲中佬睇得好辛苦㗎!

發表意見