跨年夜 call 唔到車，我想起佢⋯

昨晚在朋友家靜靜倒數完就打算 call 車回家。西貢深山出返市區，Uber 係要五百幾蚊，嚇親。改用的士 apps，call 咗 12 次，加貼士、改目的地…乜都試過，係完全冇人應機。

苦惱之際，突然諗起景哥。

話說喺 Call 車 apps 仲未通行嘅古代，我地一班女仔食完飯飲完嘢，就會 call 夜更司機景哥：「Hi 景哥！余小姐啊，我地而家喺威靈頓街近扶手電梯啊，要四架車返屋企，張小姐、李小姐、劉小姐同我，唔該。」

幾夜都好，三分鐘內，必定有景哥團隊的司機回電。

遇上幸運日，景哥會親自嚟接送。

見到景哥架車，一班女仔會好似見到明星車咁開心，揮曬手嗌曬咁。 #諗起都覺得低能

景哥係一位親和力特強的中年肥佬，有點似 Bob 叔。駕駛期間不多言、不過份超速、不會狂㩒電話。總之坐佢車係有一份額外的安心。

然後什麼快的、Didi、Uber 進場，打俾景哥的次數越來越少，近年已經完全無搵。

直到尋晚 call 唔到車，諗起景哥，就打過去，唔知點解仲緊張過打俾舊男友。

接通了，係景哥。

唔敢扮熟，只見外地交代出發地同目的地。

景哥的回覆，係 2021 第一暖：「即刻幫你搵，余小姐。」

沒有被遺忘的感覺原來咁美好。

世界如何萬變、科技如何卓越，取代不了的叫人情味。

艱難的 2020 過去，不敢天真地宣揚明天會更好。不過，既然我們僅有已是我們的所有，今年就努力學習善用僅有。

即使無力感越來越強，我們還能站在自己美好的回憶裏，讓別人明白何謂美好的回憶，令值得被記住的人繼續被愛、不被遺忘。

👉🏼：MW、IG

原刊於作者 Facebook 專頁，現題為立場編輯所擬。