立場新聞 Stand News

香港樂壇的新時代

2021/4/22 — 12:25

【文:愛・香港流行文化】

啱啱舉行既 Chill Club 年度推介榜可以話係近年最好睇既音樂頒獎禮,表演有心思,好似睇緊一個大型又高質素既演唱會,頒獎結果都係民意選擇。就算歷時兩個半鐘都可以無悶場,亦見證到香港樂壇進入咗新時代。

成晚既節目貫徹 Chill Club 一向既高質素。由一開始用 medley 去介紹 20 強歌曲,再到唔同歌手 crossover,就連新人都有機會表演,每一部分都精心鋪排過,歌手都有認真準備、唱自己作品既歌手固然表演得好穩定,唱人地歌既歌手都驚喜地帶嚟唔少新鮮感。而我最鐘意既環節係 C allstar,、Dear Jane 同 Mirror 既 crossover,依三個組合不論曲風、唱法,甚至表演方式都完全唔同,但係當佢地唱互相既作品個時都唱到自己的風味。C allstar 將一首澎湃好有力既情歌唱到做抒情歌;Mirror 將 <逾越生死> 依首悲情作品變做跳唱歌,隻舞排得好好又跳得齊;而 Dear jane 就將跳唱歌變到一首 band 既 rock 歌,三首歌都比到觀眾耳目一新既感覺。頒獎方面 viutv 採用咗 100% 民意去決定花落誰家,而且主要獎項都有金銀銅獎、認受性十足,唔會好似 tvb 咁只係頒獎比自己人,以第一次搞音樂頒獎禮嚟講可以話係好出色。

廣告

不過我覺得有幾個位可以改善既話會更好。首先係得阿 thor 一個做主持有啲吃力,去到後段已經唔係好諗到講咩,多一個主持效果會比較好。而音響方面雖然比全民造星決賽有所進步,不過大細聲控制都係差少少,有時會蓋過咗歌手把聲。最後就係鏡頭運用,有幾個表演既鏡頭不停 zoom in 又 zoom out,睇到頭都有少少暈,間中仲會影咗唔知邊度,鏡頭需要更穩定,觀眾會睇得比較舒服。不過始終 viutv 搞現場直播既經驗唔多,相信佢地汲取到今次經驗之後下一年一定會有進步。

依個節目除咗精彩表演之外,其實仲睇到香港樂壇的新舊交替。今次頒獎禮大贏家林家謙同 Mirror 成員都係近年出道既新人,佢地可以話係未來幾年樂壇既主力軍。而其他參與表演既歌手好似許廷鏗、陳柏宇、C allstar 等等,唔經唔覺依班歌手已經出道咗超過十年,各自都有街知巷聞既歌曲,撐起咗過去十年廣東歌市場既低潮期,雖然去到今日佢地既熱度未比得上 mirror 等等既新人,亦未必可以再拎到更多獎項,但係佢地都願意繼績為樂壇貢獻,為樂迷帶嚟好歌,甚至同唔同新人合作交流,依種新舊交替絕對會令香港樂壇更加多元化,歌曲質素亦會更高,廣東歌可以再次成為潮流。

廣告

總括而言,樂壇最需要係樂迷既支持,而 viutv 正正創造一個平台比歌手發揮同宣傳廣東歌。雖然要重拾昔日光輝並唔係一件易事,但係我相信只要有香港人支持,香港樂壇一定可以越做越好。最後我希望 Chill Club 可以保持認真製作,繼續帶好歌比觀眾!

作者簡介:一個鐘意香港流行文化既後生仔,得閒會寫吓文用大眾既角度講吓廣東歌、香港既電視節目同電影,希望未來有多啲香港人留意香港流行文化。Instagram Page / Facebook Page

發表意見