立場新聞 Stand News

香港的樂壇,從銷量看?從價錢看?

2021/1/28 — 13:02

姜濤,莫文蔚

姜濤,莫文蔚

【文:Quintin】

最近都收到有唔少嘅朋友提起過話,香港嘅樂壇終於有起色,社交媒體上面亦都充斥著各式各樣嘅貼文,由個人專頁去到新聞媒體都有報道。

睇完呢一啲嘅報導同部分留言之後,作為讀者有少少嘢想分享一下。

廣告

有一個好有趣嘅現象,就係好多人嘅論點都係:因為某幾個歌手嘅碟搶到斷咗市,所以香港嘅樂壇仲存在。

究竟係咪啲碟賣曬就代表個樂壇好好呢?我個人覺得唔能夠咁樣睇。

廣告

首先,如果係用母盤壓製,印製 CD 嘅數量通常都係 1000 起跳,始終太少嘅話會浪費咗個模具(印像中好似係做到 2000 隻)。假設落單嘅時候只係印製咗 1000 隻而又賣曬,咁就係咪代表好成功呢?

再講,其實咁多年嚟一向都有自己買番自己碟嘅人存在。出版咗一萬隻,自己搵親戚朋友買返 500 隻返嚟,咁其實又代表咗什麼呢?

有部分人甚至搬出喺網絡上面嘅炒價。炒到接近三千蚊,仲唔係好紅?首先一件商品定咗個價錢要有人購買先至有意義。如果大家起價 3000 冇人買,咁件貨品係咪真係價值 3000 呢?標價同實際售出嘅價錢係唔一樣嘅。

或者你會問,講咁多廢話究竟乜嘢先至有意思呢?

其實大家係時候要接受現實,就係依家大家聽歌已經係習慣咗喺串流平台上面,逐隻自己鍾意嘅歌去聽,而唔再係買一隻實體嘅專輯聽一次。大家表現對歌手或者偶像嘅熱情,唔再係買雜誌返嚟剪低個人頭貼落本簿、唔再係喺信和排隊買碟買相抽 yes卡,係社交媒體上面嘅 follow 又或者係 cap 落嚟嘅圖片。

我諗香港應該都比較少人追日本樂壇,但近年有一個幾有趣嘅現象,就係有部分嘅歌手單靠網絡上嘅攻勢同宣傳,唔需要實體出碟已經有一定嘅人氣、甚至上埋紅白(佢哋第一隻正式 EP 係紅白之後先出嘅,亦都係佢哋第一隻實體 CD)。

另一位男性嘅歌手,亦都係喺網絡上面發佈咗自己嘅歌曲,之後先至吸引到唱片公司同佢簽約。

佢哋喺突破同溫層、上到主流之前,係冇喺唱片行出過專輯,亦都冇賣斷市嘅情況。但你同日本人提佢哋嘅名,就算冇聽過首歌都知佢哋存在。

喺一個年代,實體銷量已經唔代表什麼。印製嘅數量越來越少,少到賣曬嘅情況越嚟越容易發生?大家買返嚟嘅目的已經係單純地為咗收藏、當擺設,而唔一定再係基於想去聽或者想睇下佢咩來頭而去買碟。再拘泥喺銷量上面究竟賣曬、賣唔曬、賣出幾多隻,其實意義已經係不大。

當然,網絡上面嘅傳銷有一個最大嘅問題,叫做同溫層。好似香港某對新晉男子組合一樣,佢哋就停留咗喺年輕人呢一個同溫層,直到最近經過頒獎典禮之後,先至開始多啲人知道原來佢哋係存在。

所以應該做嘅係,喺唔同嘅渠道上面宣傳,例如係一啲電視劇嘅主題曲、又或者係廣告嘅歌曲,盡量將佢哋打入唔同嘅年齡層入面,亦都即係大家做緊嘅嘢。而唔係單純地用印刷嘅數量去判斷佢究竟紅定係唔紅、有人識定冇人識。

最後對於樂壇係生定死嘅問題,雖然係廢話,但真係視乎閣下嘅觀點與角度。

如果仍然執著於樂壇係要透過 CD 同埋銷量數字去支持嘅話,咁我話比你聽:香港樂壇喺千禧年嘅時候已經消失咗。香港音樂人靠 CD 維生嘅話,應該慘過做乞衣。

但如果單純地以有冇歌曲去判斷樂壇係生定死嘅話,其實一直係有歌推出緊。大家接觸唔到,只係因為電視台一啲政策上嘅問題(例如保障電視台旗下嘅藝人有較多嘅亮相機會),又或者係保障老一輩藝人能夠持續為唱片公司提供收入而作出嘅商業考慮,但絕對唔係因為樂壇消失咗。至少今日都仲有廣東歌推出緊、有啲人係聽緊廣東歌,上 Spotify 仍然有唔少廣東歌登上香港區嘅點擊紀錄。

(以上純粹本人拙見,歡迎提出指正)

發表意見