立場新聞 Stand News

2020 年係 viutv 大豐收既一年,未來點樣更上一步?

2021/1/11 — 16:43

《男排女將》

《男排女將》

【文:香港流行文化愛好者】

近幾個月,viutv 既劇集同綜藝都成為全城既焦點,連叱咤既頒獎台上面都有好多全民造星既身影,viutv 喺開台既第四年終於收到更多觀眾關注,但比起 tvb 慣性收視同儲咗幾十年既觀眾群,viutv 都仲未可以成為主流。嚟緊我會總結今年 viutv 得到既野,同未來可以點樣吸引更多人睇。

劇集

廣告

2020 年 viutv 既原創劇終於符合到大眾既口味,比起前幾年只係偶有佳作,而且好多劇集既選取都比較冷門,今年不論係劇集既質素同播放既時間都大有改善。由 2020 年年頭既科幻愛情劇二月廿九打響頭炮,因為劇情既緊湊新鮮,再加上靚仔靚女既主角,短短既十集已經吸引大量平時唔睇港劇既年輕觀眾追看。之後播出既打天下同歎息橋雖然無受到咁熱烈既討論,但係就吸引咗唔同口味既觀眾,比起以往一播完原創劇就播外購劇,依幾套劇終算為 viutv 創造咗第一個追劇潮。

去到十月份,先有熟女強人用一大班近年好少喺電視出現既演員,拍咗一套有幾分 tvb 味道既師奶劇,令好多睇開無綫既年長觀眾轉台。緊接住既暖男爸爸同男排女將,一套講溫情,一套講青春,劇本既新鮮感同高質素,擺脫咗近年港劇愛情狗血既形象,再加上用咗鄭中基、張可頤同 Stephy 依幾個好有觀眾緣既演員做主角,一次過吸引曬老中青既觀眾。

廣告

因此,2020 年 viutv 同時吸引咗睇開 tvb 同唔睇港劇既觀眾,不過比起 tvb 始終仲有一段距離。未來我認為viutv首先要增加原創劇既數目,唔一定要套套都好出色,但最少可以保持住觀眾睇電視既習慣,畢竟有唔少觀眾都係今年先開始開翻電視。另外,劇集可以試更多既新元素同用新既演員,比起搵好多出名既明星做牌頭,新面孔一嚟成本比較低,二嚟可以比到大眾新鮮感,而 tvb 一直最令人詬病既正正就係套套劇既劇情同演員都大同小異,適逢全民造星有咁多有潛質既演員,例如搵 Manson 同 Zeno 拍一套 BL 劇,相信會有好多觀眾有興趣。

全民造星3

今屆全民造星既討論可以話比前兩屆加埋都要高,因為疫情同埋前一輪既煲劇潮,更加多觀眾開始睇 viutv,再加上今年男女藝人再出發既主題,未開播已經有唔少話題。開播之後又因為參賽者既參差表演受到更多既關注。去到分組階段,參賽者既熱血同努力帶來好多唔同種類既精彩表演,更加慢慢睇到每個參賽者既特色,比起早兩年大部分既選手都員只有唱歌或者跳舞比較好既印象,今年可以話係每個人都獨當一面,可以清楚咁講到佢地既特別之處。再加上今屆既導師同評判既選擇同埋製作開始成熟,令成個節目都好好睇,無咩悶場,所以引起咗全城熱話。

汲取上屆既經驗,完咗比賽之後大部分參賽者都無再喺電視出現,令佢地既人氣不升反跌,最終 viutv 簽既三個造星2 既參賽者去到最近先組成到團體,完全比造星3 既參賽既人氣蓋過。因此,我認為 viutv 應該借依家既熱潮,將造星 3 既參賽者加入 viutv 既綜藝,甚至開套綜藝比佢地,一方面可以維持佢地既人氣,最重要係可以保持住佢地既 fans 繼續睇 viutv。如果要開全民造星 4,我就建議要改少少形式,例如比翻素人參賽,保持翻觀眾既新鮮感。

廣告 

由 2020 年年初開始,好多廣告商因為網民抵制 tvb 而轉投 viutv,再加上今年節目質素同埋觀眾既提升,基本上每一個廣告時段都充滿唔同品牌既宣傳,而大大小小既節目都有廣告商既贊助,更加推出咗購物節目,喺疫情之下廣告收入急升更加證明到 viutv 今年既強勢。無可否認,tvb 依家既觀眾都仲係多過 viutv 唔少,但係點解可以吸引到廣告商?原因就係 viutv 既忠實觀眾遠比 tvb 多,現時睇 tvb 既多數都係上咗年記慣咗開電視既觀眾,佢地可能會睇曬每一個節目,但係主要都係為咗消磨時間,唔會好認真睇,莫講話中間賣咗咩廣告,佢地連劇情都未必記得清楚。相反,有好多 viutv 既觀眾好認真咁睇曬每一個劇集或者綜藝,劇集既取景地點,劇情既細節,甚至演員既一兩個表情都有好多觀眾討論,即使完咗之後都有唔少 fans 繼續討論當中演員既動向,甚至買佢地代言既產品。對廣告商嚟講,佢地會選擇一百個睇完佢地廣告會幫襯既觀眾,多過一萬個睇完佢地廣告但係無後續行動既觀眾。所以 viutv 成為咗廣告商 2020 年既選擇。

未來,我認為 viutv 如果想進一步擴展佢地既廣告收入,除咗電視上既宣傳,佢地應該善用佢地既 YouTube channel。Viutv 既觀眾比較年輕,佢地每日睇 YouTube 既時間點都比電視多,而將同部分廣告商合作轉為拍 YouTube 片既形式,可以吸引更多廣告商,始終電視廣告比較貴,而且黃金時段檔期好有限。網上廣告對電視台嚟講成本都比較低,更多可以比到旗下既幕前幕後更多既工作機會,累積佢地既人氣,吸引更多既觀眾睇 viutv 既 channel 或者電視節目,長遠嚟講可以更穩定咁發展。

總括而言,viutv 喺 2020 年得到咗好多,但距離成為一個多人睇甚至係主流既電視台都仲需要唔少時間。2021年,希望 viutv 可以保持住依個勢,拍更多有質素既節目比香港既觀眾,話比廣大既市民知香港都仲有值得睇既電視台。

作者簡介:一個鐘意香港流行文化既後生仔,得閒會寫吓文用大眾既角度講吓廣東歌、香港既電視節目同電影,希望未來有多啲香港人留意香港流行文化。 (https://hkpopculturelover.medium.com/)

 

 

發表意見