立場新聞 Stand News

Shamshuipo is where

2020/7/27 — 14:09

牆身重新油過,但係油到一撻撻。(作者提供)

牆身重新油過,但係油到一撻撻。(作者提供)

【文:local9up】

早一排「Shamshuipo is the New Brooklyn」引起咗一番爭議。關於依個睇法,我想講嘅……係…無嘅。因為始終自己又唔係住個區,亦都無係個區開鋪頭,而且只係得閒先去下深水埗。對於個社區應該點發展,其實就由返生活係個度嘅人去決定先係最好。

不過我就點都同意每一區都要有自己嘅特色。記得之前同朋友傾開計,佢提到每一區應該都要有代表到自己嘅手信。因為俾到第二區黎嘅人,當一個 local trip,可以買手信返去自己個區,做一個紀念,特別係依家短期內應該都坐唔到飛機去旅行。依個提議我係絕對認同架。(希望有一日成真)

廣告

而深水埗我覺得最大特色就係庶民生活氣息好濃烈。只要走一轉,唔駛睇啲居民,剩係睇招牌/牆身,依種感受已經好強烈。

你會見到有啲招牌其中一隻字甩咗,由佢打橫瞓係到;

廣告

其中一隻字甩咗,由佢打橫瞓喺到

其中一隻字甩咗,由佢打橫瞓喺到

又會見到同樣係有隻字甩咗嘅招牌,就咁用啲牛皮膠紙貼返上去;

有隻字甩咗嘅招牌,就咁用啲牛皮膠紙貼返上去

有隻字甩咗嘅招牌,就咁用啲牛皮膠紙貼返上去

又有啲半天吊嘅招牌,上一手用咗六個格,但下手店名只需要用到兩個格,咁上一手多出黎嘅會點?就係由得佢繼續存在,但係上一手啲電話資料仲係度,唔細心睇都唔知嗰個電話係流架;

上一手招牌資料仲係度

上一手招牌資料仲係度

有啲牆身擦走咗一啲字,但又唔擦走埋剩低個啲,望住佢會令你幻想,究竟原本係XX心中,定係中心XX;

牆身嘅字擦啲唔擦啲

牆身嘅字擦啲唔擦啲

仲有你又會見到有啲大廈外牆,似係曾經重新油過,但係又油到一撻撻架喎。

總知走一轉深水埗就真係充滿驚喜,強烈嘅庶民生活氣息。啲嘢唔係有規有矩,亦都無需要;同時,外觀無講求,只要繼續用到,無阻住地球轉,就無乜所謂。所以未必可以用一般人嘅角度去理解依區。好可能全港得依區先係咁樣,再望吓啲菜檔、豬肉佬、排檔、餐廳等等做生意,所有嘢加埋一齊就真係好正!

之前另一個朋友話羅文嘅激光中首歌好有深水埗 feel,好可能就係咁。(帶頭盔,純個人感覺)

「光加熱就等於火
火加歌就等於我
若我與歌再加上你
溫度將提高更多
所以你應靠近我
不要再自我封鎖
此一刻你屬於我
你再也沒法擋 Hey」

其實頭先講嘅街景都係喺位於長發街附近一帶,有啲人會將長發街當做喺長沙灣區,而我就會當佢係深水埗區。所以究竟真正嘅Shamshuipo is where?我就認為每一個人,心目中嘅地圖都唔一樣。正如小朋友同大人對「世界」都係兩個觀念,寫到依度,要文青一下,引下北島嘅嘢-

「看到兒子蹣跚學步的錄像帶,心有所動—那是旅行的開始。其實,一個人的行走範圍就是他的世界。」

對於小朋友嘅「世界」好可能純粹只係自己住個區,但係大人嘅「世界」就真係坐飛機出國嘅概念,所以好多時每個人內心都有屬於自己獨有嘅地圖。有人認為長發街係喺長沙灣,可能係出於近長沙灣地鐵站嘅關係;但另一方面,去長沙灣政府合署其實由深水埗站出發近過由長沙灣站去架bor 。而我會將長發街當做深水埗區入邊,係因為第一次去個陣,啲人同我講「深水埗長發街」,所以好自然將佢列入咗深水埗區。

所以Shamshuipo is where?對於每一個人嘅意義都唔同,無得一概而論。仲有嘅係只要細心欣賞條街,就會睇到好多嘢。又或者出街試吓抬頭望吓個天,就會發現別有洞天。

如果想睇網上對於「Shamshuipo Is The New Brooklyn」嘅各方意見可到以下網站《引發熱議的香港赤峰街/Brooklyn/Shoreditch》內文有link連結去各人嘅意見。

另有一篇wontonmeen寫嘅意見

作者 Facebook

發表意見