立場新聞 Stand News

一位自稱前線中級警務人員:香港人,請停下來想一想 年輕人,請加入警隊

2019/7/31 — 16:59

【文:一位前線中級警務人員】

7月21日係我當差多年以黎最痛心既一日。元朗鄉黑無差別喺元朗大街同西鐵站襲擊市民,就喺市民最需要警察嘅時候喺無一個警察可以及時到場而作出即時介入協助。當晚喺唔同新聞片段睇到襲擊片段,我真係恨不得自己就係果兩個首先到場嘅伙計,兩個人係唔夠做,但至少有軍裝即時上前阻止,班鄉黑會忌你三分先;就算得兩丁友,都起碼可以指示市民點逃生。如果果陣係現場附近都真係好想落去幫手,老實講,攞住張 warrant card(委任證)為嘅係薪高糧準,但都係一分責任,心入面有條良知底線係唔可以越過。

《鏗鏘集》早幾日重組左 721 當日嘅警力調動,當日喺襲擊發生前曾有 MP Car(巡邏車)經過大量白衣人集結嘅鳳攸北街,如果果班係黑衣人嘅話個處理手法會唔會唔同?麥業成有通知 PCRO SGT(警民關係組沙展)元朗嘅不尋常集結,SGT 有無適時通知環頭?環頭接到通知有無做相應行動?喺警力被大量調動到港島區做POE(public order event)而環頭警力不足嘅情況下,元朗出現咁大型嘅不尋常集結同打鬥,RCCC(警察電台)有無觀察到事態發展﹑爆廠嘅 999 報案系統有無同時影響全香港嘅報案狀況﹑可唔可以調動其他環頭警力、或者即時有無得 reform 喺某處 reserve 緊嘅隊伍落元朗 (當日有做但實際執行需時),太多野需要探討。其實可能當日班伙計一人行多一小步,踢多兩個竇(截停搜查)、MP Car 行多兩個圈,揾兩個伙計 mon 住大量集結嘅白衫佬,就已經解決到。以上說話都係事後孔明,但係責任承擔,警隊責無旁貸。

廣告

警察嘅專業性,寫哂係 178(警隊抱負、目標及價值觀),第一個 1,叫做「使香港繼續是世界上其中一個最安全及穩定的社會」。成日話警隊係香港最後一道防線,元朗衝突搞成咁嘅局面,任你盧偉聰、游乃強、曾正科有幾多解釋論點,事後拉幾多人,市民大眾都唔可能會接受,原因係當市民真係需要差人幫手嘅時候,佢地係得唔到警察支援;元朗居民商鋪從此夜晚出個街、著件黑衫都會驚,而差人係幫唔到佢地。呢樣野同出面 operation 打緊、班暴徒點打差人、警民點衝突、市民點鬧死黑警無關,呢個係警察嘅使命職責。因此,不論張建宗喺未知會警方下倉猝道歉是否明智,事實上警隊係需要一個道歉,一個交代。

由 612 示威開始,經歷無數次清場同警民衝突,成個社會輿論同氣氛已經有好大轉變。市民嘅焦點亦由撤回逃犯條例到五大訴求,去到依家主要集中對警察使用武力同執行職務對錯嘅批評。勇武對於警察嘅對抗行為﹑武力使用愈來愈強,由就咁衝到掘磚擲到有持木盾、刀、弓箭、氣油彈等,而警隊武力使用亦愈來愈開放,由以前 d 老闆提起CS(催淚彈)都擰晒頭到依家 CS﹑橡膠彈﹑海綿彈等都容易攞 approval。當衝擊人士嘅武力層次再提升,差人就相應提高執法力度,然後重複,沒完沒了,社會仇恨不停增加。

廣告

由本來大部分市民做港豬到一百萬人出黎遊行發聲反對逃犯條例,去到依家嘅局面社會大部分界別都表態要求政府問責、正式撤回同成立獨立調查委員會。行會同建制議員有所動搖不在話下,當平時唔出聲嘅公務員系統同親建制嘅商界都出嚟,其實班問責官員喺呢個時候真係壽終正寢,到依家政府都無相應措施出黎穩定民心係極之可恥。但各位真係要諗下,警察係政府同市民之間嘅夾縫,當警民雙方繼續升級行動,勇武用以武制暴嘅方法報復警察,衝突場面日日持續,唔只消耗民生﹑兩敗俱傷,最終政府又係是但譴責遺憾兩句繼續搬龍門,繼續用警隊做擋箭牌,無錯可能打贏警察會令大定出發洩憤,但市民真正關心既政治議題係呢世都唔會解決,當社會不斷激化,到底邊個會得益,坐享其成,相信大家有眼睇。激化暴力只會給予政府唔回應訴求嘅藉口,同埋做成市民同警察無辜受傷。

社會仇警情緒愈來愈強,每日社交媒體都講緊警察濫暴,警察群組傳來傳去都係同事受傷﹑暴徒攻擊差人嘅片段。慢慢社會話題會好單一喺警察嘅一言一行,將好多真正要做嘅事收埋左。問心果句,依家林鄭同你講撤回大家條氣會唔會舒服左?理性地諗,如果仲相信香港係司法獨立嘅話仲應唔應該要求特赦,政府有無定性暴動同法律上告暴動有無關係?現實地諗,聽日即刻俾你雙普選可唔可能?我唔係要講咩撐警宣言或者潑冷水,只係想講要達成政治訴求係要理解現實形勢,目前最能夠令政府讓步,作出公正判斷同改革大局嘅就係成立獨立調查委員會,認真檢見下政府包括警隊嘅不足同日後嘅大方向,同埋諗諗點樣增加政策民意基礎,改組下 d 繁文縟節,如果唔係就算係我射多一百幾廿萬粒 CS、林鄭下台揾劉德華做特首都一樣係死。

而係呢個時候,和理非變得極度重要,而更加要阻止身邊嘅人再衝擊,唔好俾政府有位入。不論政府嘅民意授權有幾低,最終佢地要繼續撈警去都係好睇社會各界支唔支持。大家繼續努力拉攏更多界別要求政府回應訴求,愈多聲音表態令政府認受性愈低,最終喺可以迫使政府作出適當行動。仲有,推翻政府行港獨係無可能,如果你地仲有心係香港爭取權益,毫無疑問一定要走入政府個遊戲規則度做改變,用依家嘅民意基礎部署嚟緊嘅區議會同立法會選舉,走入建制內部為民發出有改變能力嘅聲音。只要各方團結一致,就算你唔出氣油彈、弓箭、唔放火也一樣可以有好強大嘅民意威力。

最後,希望各位鬧緊警察嘅年輕人,我絕對同意警隊好多不足需要改善,如果各位對香港社會仲有一絲信念,我誠意邀請大家加入政府加入警隊,並堅持初心向上爬至管理層位置,從體制根本作出改變,共建美好香港。

編按:標題為編輯所擬,原題為「香港人,大家請停下來想一想」。


 

發表意見