立場新聞 Stand News

一名15 歲前線示威者:反正點示威都冇用,我不如死咗佢,最好一槍啪過來

2019/6/10 — 14:55

作者圖片

作者圖片

【文:Tung Kwong】

「反正點示威都冇用,我不如死咗佢,最好一槍啪過來。」只有年約 15 歲嘅佢咁講⋯⋯

9 點幾,有幾個想衝出馬路嘅示威者被警察趕回行人路,此後,一班示威者開始集結同一位置,好快就有多於 200 人。

廣告

我留低咗喺佢地身邊。

令我驚訝嘅係,相比旺角騷亂被判罪嘅示威者,哩班明顯再後生好多,最細嘅目測應該只有 15 歲,當中約有四份一都係女仔。

廣告

問佢聽日洗唔洗返學? 「俾人拉咗學校會知架喇,不過最好都係唔好俾人拉囉⋯⋯」

一個較大年紀嘅話,佢今日冇加入遊行隊伍,而係直接來金鐘,「與其嘥力行成日,不如直接來睇下有咩實際野可以做⋯⋯香港人真係好潔癖,大聲啲都話你係鬼想搞事,睇我個樣都知唔爭嗰幾百蚊一工啦,東區老鼠哥咩⋯⋯」

(意指前日東區所謂黑社會小頭目,綽號老鼠,凌晨揸 Benz 掟汽油樽落警總對出路面。)

「反正點示威都冇用,我不如死左佢,最好一槍啪過來。」 只有年約 15 歲嘅佢咁講⋯⋯

當我打電話向老婆報平安再覆述呢句時,我真係忍唔到眼淚⋯⋯

到底一個幾殘忍嘅政府,先可以迫到咁多後生仔女以死相迫? 

我哋較年長嘅一輩人以前做少咗幾多,先會令呢一代人為我地後補咁多,要不惜代價抗爭?

時近 11 點,小朋友:「算啦,都搞唔起架喇,啲人咁散,都冇咗成半人⋯⋯」

上地鐵時,身邊朋友因為民陣主持講左幾次『俾啲掌聲自己』同播咗幾首歌而非常憤怒:
「原諒我講句,相比起而家仲喺外面班?仔,在下各位,都係垃圾!包括我! 聽日準時返工啦!垃圾!」

無錯,相比起呢班可能已經捱慣警棍、胡椒噴霧嘅後生仔,我真係一舊垃圾!

最後,我只想同 和理非暴力嘅人講:
唔好再以為衝就係鬼!警察絕唔會白痴到請人打自己,例子:老鼠哥掟樽都只會掟路面同暗角!你係咪真係信個警司話老鼠哥唔夠力所以掟少左 20cm?
香港嘅抗爭路線、氣氛,早已昇華到武力層面,唔知,只係因為你唔入流或選擇性唔知。
當你唔認同他人嘅行為同時,請唔好指責點解人地同你唔同,各自上山,各有各做!

發表意見