立場新聞 Stand News

一年來嘅罷工運動,無任何一次係「失敗」

2020/7/6 — 22:51

作者 Facebook 圖片

作者 Facebook 圖片

經過咗噚晚嘅新界西初選論壇,相信各位手足都對我哋一眾參選人嘅理念有更深認識。工會戰線同經濟圈戰線響未來抗爭嘅角色非常重要,亦成為我響論壇之中著墨比較多嘅部份。

議會、工會以及經濟圈戰線係密不可分,民間組織越強大,就越能夠支持抗爭運動,香港人更有需要督促代議士響抗爭運動之中嘅表現;而議員亦必需要用盡身位,支援各行各業所遇到嘅政治打壓問題。

初選論壇討論之中,天水連線伍健偉提出咗有關「罷工係咪失敗」嘅問題,質問究竟係「香港人失敗」,抑或係「組織者失敗」。當然,我好明白大家對罷工行動未有足夠信心,但呢一年以嚟嘅罷工運動,絕對無任何一次係「失敗」。過去呢一年,出現好多於運動而生嘅新工會,過程之中,我以及工盟手足盡力希望提供協助,同呢一班嘅手足並肩而行。

廣告

由 2019 年 6 月號召第一次罷工,到 8 月 5 日、9 月 2 號 3 號接連的大罷工,我哋其實係見到市民係越來越熟習罷工作為抗爭嘅方式;當然我哋明白,不同的工會在抗爭嘅位置各有不同,需要時間溝通;我哋無意自居為「大台」,把罷工的功勞攬上身,相反,職工盟盡力協助不同工會的行動,無論是否屬於我哋嘅成員會、係新工會抑或舊工會。

剛剛完結嘅 6 月 20 日嘅罷課罷工公投,雖然我哋未能夠取得足夠市民嘅支持,但正正就係一個機會去認清目前香港人響抗爭運動中嘅困局。而我哋亦不應該判定罷工係「失敗」、又或者係香港人於組織者間二元論嘅失敗;咁評價無論係對參與抗爭嘅香港人,抑或對參與組織嘅各個工會而言,都唔公允。咩為之真正失敗?如果我哋就此判定失敗、氣餒、放棄、打定輸數,咁先係真真正正嘅失敗。

廣告

 

(標題為編輯所擬)

作者 Facebook

發表意見