立場新聞 Stand News

一萬蚊的幾點啟示

2020/2/26 — 13:15

1. 新一份財政預算案向全港十八歲以上香港市民派發一萬蚊現金,回應不分陣營嘅訴求,係「鬍鬚曾」派六千蚊後嘅首次。

2. 今次派錢涉及 711 億公帑,只係過萬億庫房嘅一小部份,過去幾個月林奠每次開記者會加加埋埋都派咗超過 600 億,淨係俾工聯會生產口罩都涉利益輸送 8 億。

3. 林奠從來都唔認同全民派錢,更加睇唔起鬍鬚曾,所以上次寧願花幾億行政費搞年幾派四千蚊都唔肯全民派錢,堅持政府要「適度有為」,所以今次肯「跪低」其實係藥石亂投,好有可能係受上面嘅極大壓力所致。

廣告

4. 呢一萬蚊唔係因為做順民,「信政府」支持中央先有。相反,無上年嘅大規模社會運動加疫情擴散加區選大敗加九月立法會選舉,根本唔會直接用錢嚟買民心。所以,「壞孩子」先有糖吃,呢一萬蚊係抗爭同攬炒下嘅果實。

5. 林奠同政府淨值係破哂紀錄嘅新低,民望越低,越大壓力要派錢紓緩民怨。

廣告

6. 如果想要更多嘅「果實」,個邏輯係更加壯大反對聲勢,逼使政府開庫買票,嚟緊九月立法會選舉係最好嘅機會。

7. 政府嘅根本角色係「資源再分配」,全民派錢均富係最唔駛用腦同技巧,亦都唔駛班高官每個月幾十萬人工。全香港收稅再派錢叫「均富」,唔係叫「施政」。總比佢明益三萬蒙面武裝分子、工聯會、新移民好少少,不過你有一萬蚊嘅同時,個三萬個拎咗十億 OT 錢嘅武裝分子都有。

8. 所以,本身庫房啲錢就係香港納稅人嘅,宜家派番俾香港人,連多謝都唔駛講聲。

9. 既然係自己嘅錢,袋得心安理行,理直氣壯。政府派錢最想嘅就係收買民心同刺激經濟,所以點用呢一萬蚊就好緊要。

10. 如果呢一萬蚊只係餘錢嘅,可以用嚟支助同路人,捐俾民間抗暴基金、資助台灣流亡手足讀書都可以考慮。只要有一萬人捐哂個一萬蚊已經有一億,多過 612 基金咁耐籌嘅錢。

11. 喺資本主義社會,金錢就係力量。難得政府打本,無理由唔集腋成裘,增強抗爭力量。

12. 仲記唔記得「黃色經濟圈」?有二百萬人將呢一萬蚊喺「黃色經濟圈」入面消費,係 200 億嘅金額,仲未計邊際利益同衍生出嚟嘅 multiplier effect,足以令一眾喺疫情下苦苦支撐嘅黃色同路人渡過時艱。

13. 再保守啲,將呢一萬儲起佢,積穀防飢;或者將錢消費喺海外,一蚊都唔留喺香港經濟體系,刺激唔到本地經濟,實行攬炒。

14. 最後,呢一萬蚊算唔算係人血饅頭?係嘅話,應該點食?

發表意見