立場新聞 Stand News

上次無線有話題作是何時?

2020/9/3 — 17:35

小圖:《成語動畫廊》「指鹿為馬」截圖

小圖:《成語動畫廊》「指鹿為馬」截圖

不計重播《大時代》,應該數到九年前的《天與地》,兩套仲要係神劇,唔係爾虞我詐的爭產或呼天搶地的多角戀題材,反映香港人與時並進,距離「港豬」歲月甚遠。

但近日有例外。N 年前《成語動畫廊》,有條片「指鹿為馬」因警謊而變全城熱話,在網上洗版。從營銷角度看,近乎無本生利,無線高層喜出望外才係,仲唔打鐵趁熱,重新包裝整個系列,例如推出「顛倒是非」手遊、「助紂為虐」籐條或「作法自斃」手飾等周邊產品,就實在太對股東唔住,枉為利字當頭的生意人。當然,毫不出人意表,「指鹿為馬」片段,好快在 YouTube 連根拔起,雖有人捲土重來,重新上載,但仍逃不過被煙消雲散的命運。

唾手可得的商機,不好好把握,政治表忠壓倒一切,這種本末倒置的營商環境下,香港的競爭力究竟跌多少,GDP 又減多少,便有待雷鼎鳴等經濟學者幫香港人計計數。

廣告

但表忠還表忠,「指鹿為馬」被消失,如非巧合,便太「欲蓋彌彰」,反而曲線證明當權者作賊心虛。試想一想,從官方角度出發,被告就是被告,勢均力敵便是勢均力敵,根本不存在所謂無差別襲擊的苦主。坊間反應激烈,控訴警方指鹿為馬,只是說明一般人連基本事實都搞錯,理都唔駛理。正如有人分不清落雨和天晴,明明落大雨,就當出猛太陽,仲唔聽人勸,唔帶遮出街。咁你咪等佢自討苦吃,畀雨嗒到濕哂囉。而家「指鹿為馬」無故消失,就反而令人覺得,當權者都知道自己拗橫折曲,知道自己理虧,怕被人嘲諷,只不過表面上點都唔肯承認咁解。換言之,如果無線有心表忠,咁 sorry 囉,你只係變相發出認證,說明 7.21 恐襲真有其事咋。

 

廣告

作者 Facebook

發表意見