立場新聞 Stand News

世事再無道理都要講道理

2021/4/17 — 15:12

2021 年 4 月 15 日「全民國家安全教育日」,各支紀律部隊舉行訓練學校開放日,一批小學生到警察學院參觀。

2021 年 4 月 15 日「全民國家安全教育日」,各支紀律部隊舉行訓練學校開放日,一批小學生到警察學院參觀。

日前見到國家安全日訓練,「愛國愛黨」嘅我真係好感動。正所謂「十萬青年十萬軍」、為國為民「拋頭顱、灑熱血」好正常。小朋友拎住槍呀、炮呀一齊攻入地鐵更加係為未來舖路,成為忠誠勇毅嘅第一步。終有一日,一定可以殺盡「敵人」……

依家當權者就係想只灌輸一種價值觀俾新一批「後生仔」去對付依家班後生仔。一代人對抗一代人。相信有關部門高層係好開心嘅。因為就算平時 CCTVB 播幾多劇扮幾多英雄都無咁多親民嘅機會。同時,又可以同一班小朋友如數家珍,介紹各種唔同嘅武器,又合下照咁樣。可以話軟硬兼施,俾小朋友一種「巴閉囉!英雄主義!疊馬」感覺。

其實睇到啲相,見到小朋友嘅表情去做啲政府安排嘅 RPG game 都真係幾擔心。

廣告

我好記得早幾年北韓旅行團大熱。我都有機會去北韓參觀一下。最深刻係參觀小學同幼稚園。當你問佢哋想做咩職業?一定答你標準答案「我想做軍人或者科學家報效國家!」;當我多手去睇下小朋友嘅功課係做啲咩嘅時候,功課內容通常都圍繞住「朝鮮軍官一個小時可以擊落五部美軍軍機,咁十個鐘最多擊落幾多部?」;再望望遊戲室同走廊樓梯嘅壁報又係朝鮮士兵拎住炸彈炸爆啲洋鬼子。小朋友嘅學習已經圍繞住武器,同打倒敵人,北韓政府潛移默化地培養出一個又一個「愛國青年」。

其實早喺第一次世界大戰嗰一年嘅 1914,英國嘅 National Peace Council 已經提出唔好俾小朋友玩咁多戰爭玩具啦!一百年前已經表明戰爭唔係遊戲,佢地反建議以平民模型取代軍人,生產工具取代槍械,避免鼓吹戰爭。

廣告

更何況根據警察部嘅指引,係唔應該將槍械指向未確定要射嘅人或者目標㗎!所有槍械警察都要當有子彈,要小心運用,唔係下下都可以喺公眾地方隨便拔槍開槍。當然好明顯香港係講一套做一套。

將戰爭殺戮當做玩具嘅模式,其實係一種好野蠻,好反人類嘅行為嚟。但係要同朝廷鷹犬、忠誠嘅「朋友」講道理……我諗真係諗多咗啦!

 

Local_9up Facebook

發表意見