立場新聞 Stand News

世界局勢山雨欲來,香港人要保持抗爭意志,積極光復香港

2020/5/18 — 22:50

特朗普、習近平

特朗普、習近平

近日接連發生咗幾單非常矚目嘅國際新聞: 

  1. 全世界最大晶圓代工半導體生產商台積電宣佈 2021 年喺美國亞利桑那州設廠
  2. 隨即,美國發動對中國大陸科技技術封鎖,除透過緊縮源自美國技術比率,限制採用美半導體設備晶圓廠出售晶片給華為,也考慮以微量原則,任何採用美國技術的晶圓廠,未來銷售晶片給華為都需美方許可。
  3. 英國《泰晤士報》引述美國國防部消息人士報道,五角大樓模擬 2030 年在太平洋與中國爆發海上衝突,美軍將會戰敗,而且難以阻止解放軍武力攻台。
  4. 歐盟與澳洲先前提出決議草案,要喺世界衞生大會 WHA 推動對武漢肺炎疫情嘅全球獨立調查,至少超過 120 個國家支持該決議案,當中除咗歐盟全部 27 國,五眼聯盟,仲有俄羅斯同非洲 54 國。
  5. 中國國家衞健委科教司監察專員劉登峰周五(15 日)在記者會承認,中國曾在 1 月銷毀武漢肺炎的病毒樣本,稱是「為了確保安全」,才「管理」引起不明原因肺炎的病原體。

加埋美國現時嘅處境:美國總統大選喺今年 11 月舉行,特朗普連任受到疫情所影響,經濟陷入低谷,失業率持續上升,近十萬民眾死亡,民望持續低於對手民主黨拜登,急需良方挽救民望,對中國態度強硬成為兩黨朝野之間嘅共識。再將呢幾單新聞放埋一齊睇,便大有風起雲湧,山雨欲來之勢。 

其中最突兀嘅係美國國防部對解放軍十年嘅武力推演,現時中美關係陷入冰點,雙方喺南海、台海局勢越發緊張,美軍海軍多次喺南海遊弋,展視軍備,隨時擦槍走火。點解呢個時候美國國防部自己會洩露出「美軍唔夠解放軍打」不利士氣嘅訊息?姑勿論呢個推演有無誇大,可以肯定嘅係,美國對呢個推演結果唔會坐視不理,任由解放軍喺十年內對美國構成國家安全威脅,所以美國現時會點樣應對呢個「十年後嘅威脅」先係最大嘅問題。

廣告

戰爭從來都要出師有名,同當年出兵伊拉克,都要首先指責伊拉克擁有大規模殺傷性武器嘅邏輯如出一轍。今次係咪想借呢個模擬,製造輿論,要喺中國羽翼未成之時作出防範,合理化主動出兵解除對美國嘅威脅?尋找外部敵人,同仇敵愾,從來都係凝聚民心嘅最好方法;再者,戰時唔會貿貿然撤換作為三軍總司令嘅美國總統。宜家首先放風,11 月前作開戰心理準備,會唔會係特朗普嘅其中一個連任計算?

退一步而言,就算唔係直接開戰,呢個亦都係向國會大幅增加軍備預算,提高美國國防開支嘅最佳理由,既可以增加美國 GDP 刺激疲弱經濟,又可防解放軍十年後稱霸世界。發展落去會唔會重蹈冷戰當年美蘇軍備競賽嘅覆轍呢?喺外匯枯乾、經濟增長減慢、資金鏈、產業鏈斷裂之下嘅中共,仲有無能力去維持高增長嘅國防預算? 

廣告

模擬推演更多番強調台灣嘅重要性,形容台灣為「中美之間最不穩定的因素」,甚至會因此爆發核戰,會唔會想藉此增強台灣軍備,合理化美台共同防禦,鞏固第一島鏈封鎖中國嘅第一步?呢個決定會唔會係台積電決定靠邊站落戶美國嘅其中一個重要因素,甚至係同蔡英文 deal 嘅交易條件?要知道台積電作為全世界最大嘅晶圓代工半導體生產商,一直都唔想牽涉喺中美之間嘅糾紛,既做蘋果生意,又做華為生意先係最化算。高調落戶美國一定係一個政治而非商業決定、以換取台灣嘅軍事保障亦未嘗唔係合理推測。

係《三體》呢部科幻小說入面,三體人因為感到人類百年後科技進步嘅威脅,第一步就係派出「智子」封鎖住地球人嘅基礎科學,令到地球再無科技突破。同樣,高科技晶片除咗用喺通訊、手提電話,仲係所有軍事設施、防禦系統嘅重要配件,今日美國禁止對華售高科技晶片,就如同封鎖住中國嘅科技發展,禁止進一步嘅軍備研發,威脅美方。再者,去到大數據年代,掌握 5G 基本上就掌控咗世界嘅話語權,華為喺 5G 領域方面傲視國際,喺十年威脅嘅背景之下,採取措施封殺華為,以遏止中共嘅威脅,係對美國保持世界霸主之位極為合理之舉。 

另外一個出師有名嘅藉口就係因應武漢肺炎向中共問責,世界各國要求進行獨立調查之聲高唱入雲,就係要坐實中共要負上全球疫症蔓延嘅最大罪責。澳洲首先打開要求世衞獨立調查,追究中共責任第一槍,中共隨即對澳洲大麥徵收 73.6% 反傾銷關稅,並禁止澳洲牛肉入口作報復。但一國之力難掩全世界悠悠之口,現今已經超過 120 個國家支持獨立調查武肺來源,當中最矚目嘅係中國盟友俄羅斯、非洲全體 54 國、歐洲 27 國全數支持獨立調查,可見世界圍堵中共之勢已成,「一帶一路」政策全面崩盤,中共外交空前孤立。唔知中共又會唔會向呢 120 多個國家逐一徵收懲罰性關稅報復呢?

美國嘅算盤就係要以疫情源頭為動機,以解放軍軍事威脅為藉口,計劃對中共喺經濟、政治、科技、軍事上作多方面制裁,而台灣同香港正正係美國插手中國事務嘅切入點。台灣年初大選,蔡英文連任,民進黨全面執政,鞏固台灣靠攏美國嘅形勢;加上台灣抗疫成功,美國乘機將台灣推上國際舞台,令中共尷尬不堪。世衞總幹事譚德塞亦開始抵唔住國際嘅壓力,將台灣加入 WHA 嘅決議交由會員國自己商討,世衞成為中美就台灣問題角力嘅第一個戰場。

同樣,既有《香港關係法》確立香港嘅獨立關稅區地位作要脅,又有《中英聯合聲明》聯合國備案嘅國際條約在手,香港嘅人權、民主問題將會係另一個西方世界嘅切入點去牽制中共。而中共亦都深深明白呢個威脅,所以絕不能夠容許香港成為第二個台灣,要喺香港倒向外國勢力之前要牢牢咁將香港掌握在手,所以無論喺政治上、人事任命上、意識形態上、經濟上、教育上、司法上多方面都以君臨天下之勢展示全面管治權力,以震懾嘅手段威嚇港人,以產生無力感,最後乖乖馴服喺中共嘅淫威之下,共同對抗外部勢力。為達至消除香港內部聲音,即使名義上撕毀一國兩制亦在所不惜,呢個就係中共對港嘅態度急速惡化,重手整頓香港嘅原因,同當年蔣介石「先安內,後攘外」嘅打算一樣。

香港人要認清事實,宜家嘅對手唔再係林鄭嘅港共政權,而係佢背後大到威脅世界嘅中共政權。比較起全世界嘅大局勢轉變、中美新冷戰時代揭幕、東亞地區地緣政治嘅大改變,香港立法會窩裡鬥一場半場嘅勝負其實不足掛齒,重要嘅係香港人認清楚全球大局勢入面自己嘅重要性,好好發揮扯中共後腿嘅角色,不在乎朝夕之爭,要保持抗爭意志,街頭、議會、國際線寸土不讓,方有真正光復香港嘅一日。

發表意見