立場新聞 Stand News

中共東施效顰ㅤ「虛招」回應國際社會花式制裁?

2020/6/29 — 22:20

作者製圖

作者製圖

今日中國外交部發言人趙立堅表示因應美方反對國安法,宣佈對中方有關涉港官員實施簽證限制,從而要對在「涉港問題上表現惡劣的美方人員實施簽證限制」。

到底坊間大家講嘅不同「制裁」係咩一回事?中方咁嘅舉動,又有咩實際效果?

制裁,其實最起碼分兩部分。針對高官黑警,制裁就係取消護照、禁止入境,甚至凍結資產,令佢地喺中國同埋香港作惡嘅成本增加。老實講,而家仲邊有有錢人將錢放喺中國?香港,都係走資轉口港。如果全球都制裁高官黑警,唔通啲錢要放喺大灣區咩?共產黨一個唔該哂,隨時用商業刑事法例充公哂佢。所以呢種上升到經濟封鎖、針對個人嘅制裁,絕對係有一定威嚇力。

廣告

而「取消特殊待遇」,其實只係當共產黨無法繼續維持香港高度自治,國際社會視中港一體,先至會取消與中國唔一樣嘅特殊待遇。就如似簽咗張合約,你違反上面條款,合約自然無用。與其話呢種係「制裁」,倒不如話國際社會認清咗中國管治香港、破壞高度自治嘅真相,從而根據合約精神,因應香港已經唔再符合高度自治嘅「條件」,從而取消特殊待遇嘅「結果」。

至於美國本土對於中、港企嘅金融制裁,就更加係涉及更高層面美中互相博奕,由知識產權轉移、到竊取機密資料,基本上係回應過去二三十年中共為咗「超英趕美」而累積嘅各種犯規行為。過去國際社會唔追究相關違規行為,係因為覺得中國有一日會開放,會變得遵守國際社會嘅規則,以及會有民主及自由化。但近呢幾年嚟,尤其是習近平主導嘅「戰狼外交」崛起,導致國際社會有根本性、結構性嘅對華策略轉向。實際上,香港過去一年示威喺呢種大轉向上扮演嘅角色未必咁重。

廣告

所以歸根究底,中共今日面對嘅窘境有遠因近因,但都係「咎由自取」。今日出嚟「反制裁」美國官員,真係令人搲頭 — 真係會有西方世界官員想入境中國,將資產放喺一個無法治嘅地方咩?「東施效顰」,反而曝露自己已經無任何可以著力嘅地方,要以嘩眾取寵嘅方式保持強硬。

結果,就不斷以國安法將香港送入深淵,同時將香港呢位「人質」嘅前途同美國、國際社會談判。香港嘅沉淪,就係由有一班完全唔重視香港以及香港人嘅管治團隊開始。

 

作者 Facebook

發表意見