假才子

假才子

比較政治碩士學歷、傳媒工作者。取名「假才子」是因為潮流興才子才女,但又沒有人承認自己是假大空的偽才子才女,所以先行澄清。文章內容不好就還請見諒,畢竟我不是個正牌才子。

2020/2/27 - 19:06

中共為何怕民主派立法會過半

傳媒報道,中聯辦主任駱惠寧接見親中團體代表,提到不能讓反對派取得立法會過半議席,奪取管治權。到底立法會過半有冇用,時不時都有網民討論,但如果係冇用,何解中共會怕依個情況,甚至認為已經係奪取管治權?筆者下表簡單整理咗立法會過半有咩效用。

作者製表

作者製表

廣告

首先係選主席。主席有幾惡,近年大家都可以通過親中派越來越張牙舞爪睇得好清楚。主席主要工作係主持會議,但當中包括趕人出房、滅人聲、剪布、幫政府玩議程……等權力。淨係爭到主席做,已經有一定差別。

跟住,係可以否決政府提出的法案,包括財政預算案。大家可能會諗,只係否決有咩用,但至少再有惡法,再有為警察加薪同買武器,都可以否決。而且應該好多人漏咗,其實否決財政預算案可以間接啟動罷免特首。

根據《基本法》第 50 條,「……(如)立法會拒絕通過政府提出的財政預算案或其他重要法案,經協商仍不能取得一致意見,行政長官可解散立法會」,而第 52 條,「行政長官如有下列情況之一者必須辭職……(三)因立法會拒絕通過財政預算案或其他重要法案而解散立法會,重選的立法會繼續拒絕通過所爭議的原案。」

兩者夾埋,就係如果立法會連續兩次否決財政預算案,特首必須辭職。當然必要的係中間重選立法會都維持過半,但總之一否決財政預算案,就已經係一個憲制危機的開始。而如果民主派可以長期維持立法會過半,就算只係多一票的 36 對 34,都握有對特首的間接罷免權,所以中共會話奪取立法會過半就係奪取管治權。

至於直接罷免特首,需要三分二通過同報請中央決定,不作考慮。議員提出議案,包括私人法案、特權法調查、改議事規則等,都需要分組點票通過,所以立法會簡單過半係做唔到。直接由民主派提出政改亦都係唔夠。但就算只係前述的權力,都已經足以癱瘓香港政府,逼港府同中共同香港市民談判。

 

作者 Medium