立場新聞 Stand News

中共要搵樣嘢讚林鄭都好難

2019/11/29 — 16:36

據說北京信了自己友的山埃消息,連累建制派在區選大敗,中共一時間不知如何反應。

昨天,終於見中國駐英大使劉曉明接受 BBC 專訪,代表中國官方有了套說法。

中國官方對外口徑,以及背後思維很簡單:所有問題皆別有用心的外國勢力所引致,中國人沒有錯,中共更加沒有錯,中共領導人更加自盤古初開以來都不可能有錯(最後一句通常不用說,記在心中就可以)。

廣告

劉曉明當然不例外,死撐林鄭乃指定動作,起碼去到呢一刻為止。

但可以點樣撐一個民望屢創新低、得罪哂建制派商界領袖連八大國際公關公司都唔敢幫佢重建形象的 object 呢?

廣告

劉曉明或者要當全世界都係盲嘅,至夠膽話林鄭的工作做得很好,認為她的工作沒有失敗。會唔會佢都認為林鄭超額完成了當年的競選承諾「We Connect」呢?從香港人的角度而言,林鄭在「團結大多數,孤立一小撮」方面,確係神奇、頂級、超卓。無林鄭,全世界怎會認識「香港人」的不屈與堅持,美國《香港人權與民主法案》又怎會獲通過和生效?無林鄭,民主派又可能扭轉頹勢,明明多場補選節節失利,幾個月之間卻大反彈,不單社會抗爭遍地開花,仲搞到建制派在區選輸到一仆一碌?

林鄭犧牲小成,成全大我,都確實估妳唔到。We Connect 啫,無話過個「We」包埋佢自己㗎嘛,係咪先?

不過,劉曉明最有趣嘅係,佢認為林鄭「與民眾進行了一百多場對話交流」值得肯定。呢樣嘢,連保皇黨都唔會講。被內地粉絲稱為「香港真特首」的光頭警長(咦,林志偉呢?)最多係質疑有 160 萬廢票。民建聯嬲死林鄭,鬧少句當幫忙。陳健波就埋怨,今次選民只睇顏色、不理政績(建制派的政績是蛇齋餅粽,以及那些益自己友、像天價天橋呢類小白象工程嗎?)劉曉明究竟點解會計到有一百多場對話交流呢?唔通又係西環放料?抑或計埋和建制派支持者大大小小的見面場合呢?「對話交流」又怎可以當做政績呢?如果佢真係做得好,民主派怎可能偷到雞,應該至少六、七成人投票畀建制派囉,係咪先,仲駛乜驚外部勢力搞搞震?

其實香港人只記得,林鄭搞過一場對話會咁大把,而且嗰次對話會後,無幾耐,就引用緊急法禁蒙面。真係唔該哂!

 

作者 Facebook

發表意見