立場新聞 Stand News

中國式現代生存空間理論?

2021/1/7 — 11:57

中國國旗 l Prachatai @ flickr —Attribution-NonCommercial-NoDerivs 2.0 Generic (CC BY-NC-ND 2.0)

中國國旗 l Prachatai @ flickr —Attribution-NonCommercial-NoDerivs 2.0 Generic (CC BY-NC-ND 2.0)

【文:天常】

話說前幾日睇到中國官方公布的《中華人民共和國國防法(修訂草案)》中多次出現「發展利益」一詞,令我有 d 睇法,所以想投稿同大家分享一個小故事。

就係差唔多 120 年前,即係 1897 年,一個叫拉采爾既德國地理學家當時提出左一個名叫 Lebensraum 既理論,中文叫「生存空間理論」,我相信如果有讀過二戰背景歷史既人,都熟口熟面,咁究竟個理論講咩既呢?其實都不外乎講緊d阿媽係女人既野,就係所有生物都需要一定既生存空間。咁個理論就認為國家亦都好似生物咁,所以一個健康發展既國家透過去擴張領土黎增加自身生存空間係一個必然現象。

廣告

咁其實無咩野既,人都頂唔順住百幾尺既龍床盤喇,係咪先?用係國家度咁有咩咁特別呢?個理論特別就在於有人用。曾經有條友大概講過咁上下既野:「......只有在地球上有足夠大的空間,才能保證一個民族的生存自由……必須......引導我國人民從目前有限的生存空間走向新土地的道路......以期待於未來一百年中為我國人民取得足夠的生存空間」。大家聽完之後,係咪覺得似曾相識呢?總一句話講晒,我國家要生存要發展,就要空間。

而跟住落黎就係戲肉,咁搞咁L多野,要幾多生存空間先夠用呀?講上面個堆咁愛國家愛民族既說話個條友,亦有提過:「......恢復xxxx年前既疆界係愚蠢既主意,因為對於民族所有成員黎講,呢一個唔係一個真正圓滿的終點……只係由一個尚未終結既政治鬥爭而確立既臨時疆界......」。咁對於未來既發展藍圖佢又有睇法:「......首先將所有鄰近相同民族既地區囊括入自己個袋度,就叫「大xxx國家」,但長遠呢,就真係要講返句:我唔係想針對邊個,我係話在座咁多位都係垃圾,總知你唔係自己友,我就要黎拎你土地,大概拎到 double 自己土地就差唔多架喇。

廣告

咁好喇,咁其實都係講緊「發展係硬道理」個類野啦,有咩特別啫,咁愛得自己個國家,實係為自己國家利益著想架喇,係咪先?但我只係想同大家講,前兩段所講既野個位人兄你都識,佢叫希特拉,佢之後做過咩我唔駛多講。當日佢就併左鄰近地區,包括奧地利、捷克斯洛伐克、波蘭等全部或部份地區,作為德國既生存空間。咁最後佢係咪食到「double 足三兩」咁款就肯收手呢?我諗大家有眼睇

老老實實,我從來都唔明一面屌打自己人,一面又係咁同人講五族一家親係咩玩法。但當去到前兩日見到「生存空間理論 2.0」或者「現代生存空間理論」既時候,我開始有d 明白了

#發展利益 #中國國防法 #生存空間理論2.0 #現代生存空間理論

作者簡介:一位讀過歷史的香港廢青

發表意見