立場新聞 Stand News

乖孩子、壞孩子疫苗親疏有別?

2021/2/23 — 21:54

雖然同樣叫「滅活」疫苗,但林鄭月娥同賀一誠打嘅新冠病毒疫苗唔係同一隻。中國賣去香港、澳門嘅疫苗唔係同一間公司出,優先畀乖孩子澳門嗰隻可能係好啲。

目前為止,中國有兩間公司推出咗「滅活」疫苗,一間叫「國藥集團」(Sinopharm)、另一間叫「科興生物」(Sinovac),兩間公司英文名有啲似,混淆咗以為係同一間唔出奇。雖然國藥同科興疫苗嘅第三期研究都尚未刊登國際期刊,但由已公開嘅資料得知,國藥保護效力係 79.34%,而科興喺嘅保護效力有幾個講法,數字由 50.65% 至 100% 。

我唔熟醫藥領域,更唔可以單憑一兩個數字去武斷科興出品嘅疫苗對比國藥較「次等」。但係,由港區人大政協委員去深圳打嘅疫苗係國藥出品嘅事實,可以推算「阿爺信心之選」疫苗係國藥而唔係科興。香港建制派對國藥疫苗「更有信心」早有端倪,人大常委譚耀宗早前透露「身邊有朋友希望接種國藥疫苗」,並呼籲港府引入國藥疫苗畀市民「多個選擇」, 但陳肇始已否認有向國藥洽購疫苗

廣告

澳門計劃採購嘅三種疫苗,由中國購入嘅只有國藥一隻,完全無買到科興。澳門特首賀一誠、一眾高官、自願接種嘅市民打嘅係國藥疫苗,想揀科興都無。

調查發現,香港人接種由德國、美國研發嘅 BioNTech 疫苗嘅意願(54%)遠高於接種科興疫苗(28%)。我大膽推算,中國科興疫苗會將成為愛國愛港人士或者有需要作政治表忠人士嘅首選。話雖如此,阿爺似乎無將「最好嘅貨」留畀呢班人。

廣告

香港嘅建制派如果同澳門鬥紅,會輸一大截。香港建制精英不乏表裏不一之人,自己或家人手持外國護照、喺外國置業、送仔女去國際學校甚至出國讀書。而澳門愛國人士嘅愛國係比較「由心而發」,即使合資格攞葡國護照都不屑去申請,無追棒國際學校嘅現象,送仔女出國留學亦唔普遍,有閒錢置業則首選潛力無限嘅大灣區,即使澳門經濟同一帶一路國家無咩大重要關聯,都自動自覺將「一帶一路」、「內外循環」等用語掛喺嘴邊。

若果我猜測成立,唔難理解,除港區大人政協級人物外,阿爺並無將「信心之選」疫苗畀香港嘅建制派享用。最好嘅貨優先留咗畀社會上下一心忠君愛國嘅澳門。

全球新冠疫情嚴峻,疫苗供應已被稱為「新外交貨幣」,疫苗唔係純粹商業交易你有錢想買邊隻就有邊隻。中國輸出香港、澳門疫苗親疏有別不足為奇。

發表意見