立場新聞 Stand News

五一係咩嚟? 慶祝香港落後 154 年!

2020/4/29 — 12:42

作者製圖

作者製圖

【文:二百萬三罷聯合陣線】

五一勞動節喺1999年先正式納入爲香港公眾假期,不過9成9香港人都唔知道究竟五一係啲咩,甚至有啲人連五一係「勞動節」都唔知,淨係知道每逢五一,鄰國就會放大假,然後通街都係車仔同喼,行出街都覺得自己會窒息。

咁就要由154年前講起。1866年,由馬克思建立嘅世界性工會組織第一國際喺瑞士日內瓦舉行會議,通過好多有關勞工權益的,當中包括八小時工作制。兩年後,1866年5月1號開始,美國各地都有大規模嘅罷工同示威活動,有35萬人參與(當時全美人口大約5000萬),而咁多個城市當中以芝加哥聲勢最大。當然,罷工同示威唔係得一日啦,抗爭並無停止。去到5月3號,芝加哥政府出黑警鎮壓,活生生射死兩人,令到之後嘅抗議更大。翌日,有人(身份不明)向黑警掟炸彈,一次炸死7件,仲有67人受傷。之後黑警開場還擊,射死4人,超過100人受傷。

廣告

報紙就定性事件係由無政府主義者策劃嘅「暴亂」,黑警就大肆拘捕工會領導人,仲告咗8個人謀殺罪。最黐線在於,有5個人根本無去過現場,完全唔關事。8個人入面,5個判死刑,2個終身監禁,1個坐15年。

雖然呢場抗爭係慘敗收場,仲受到血腥鎮壓,但係卻係各國工人一個重要嘅啓發,去爭取八小時工作制同埋其他勞工權益。爲咗紀念美國工人嘅抗爭,1889年7月,第二國際巴黎大會就將每年嘅5月1號定爲國際勞動節,紀念呢次事件。

廣告

n年後嘅今日,香港,連標準工時都未立法,問你死未?

作者 Facebook

發表意見