立場新聞 Stand News

五一勞動節 假「恐襲」疑雲應驗《十年:浮瓜》預言

2020/5/1 — 16:21

【文:晏奴三番】

當年睇《十年》,應該會覺得每個故事都遙不可及。回顧《浮瓜》故事,講述 2020年 5月 1日勞動節(即係今日),官黑攜手自導自演一場失敗的恐怖襲擊,試圖行刺官員,再派員殺掉殺手,港府遂伺「反恐」為由推《國安法》。

郭臻導演嘅故事係咪相當之熟悉?早喺一星期前,有 telegram channel 預約開花,當時論壇上亦有 post,雖然留言只得小貓兩三隻 ——就「榮獲」各左派紙媒大肆報道,先至將預約開花消息「反哺」至 Lihkg,相當盞鬼。早喺月許前,各處網民都有共識要將「五一黃金週」—— 一個每年都令港人聞風喪膽嘅法定蝗禍 —— 藉著難得清靜,定為瘋狂「懲罰」黃店嘅行動。

廣告

莫論開花預告係咪自己人發出,根本唔重要。《浮瓜》劇情應驗之妙在於,左報藍媒大肆報道、港共橡皮圖章接連祭出「恐怖主義」,企圖與進步本土思潮畫上等號。進步思潮本來就同嗰四隻字謬以千里,依家係屈個盲人偷睇國家機密,屈一班熱愛香港嘅良民係暴民;同時將死嘅又拗返生,斬人暴徒有「高尚情操」、白衣暴動係「保衛家園」等,真正恐怖主義罄竹難書,更獲強權包庇。

廣告

喺眾網民一籌莫展之際,今早,發起人香城 Online 重申活動就是「進攻黃店」,訊息正面。官警旋即被將了一軍,只好繼續要人民嘅「正義」執法者大熱天時頂住一身盔甲,去守一堆港共呃吓你嘅「炸彈」謊言,貽笑大方。警察為咗繼續呃OT,就轉去搗亂工黨同社民連嘅四人街站。

狗官、狗察一味靠嚇,市民連出外消費都要心驚膽顫,無他,就係怕咗當權者嘅恫嚇。警察恣意虐打途人、記者,監警會無異太監,受害者申訴無門。本來就壞無可壞嘅情況,遇上中共送「大禮」,港共嘅四人限聚令就鞏固警察「蓋世太保」嘅權力。佢哋除咗非法罰款派防疫物資嘅擺攤人,仲自行釋法解讀限聚令適用於有「共同聚集目的」之人群。原來,警察私下嘅一面係不乏虐兒獸父。面對暴戾嘅執法者,野蠻嘅在位者,市民又點可以自由消費?

以前會覺得《十年》嘅故事多少有天馬行空嘅元素,「有幾可會中吖」。其實就係「情理之中,意料之外」,而當年嗰啲天馬行空嘅元素放到今日失序嘅世界中,再意外都係情理。

2020年5月1日 願手足平安

發表意見