立場新聞 Stand News

人民對林奠政權的反噬

2020/1/30 — 14:36

呢幾日香港有幾單唔算好大,但係好標誌性 Milestone 嘅新聞:

呢幾單新聞放埋一齊睇,其實比起武漢肺炎嘅疫情更加令人震驚,佢代表嘅意義係香港已經由軍政府狀態,進展成為無政府狀態,所有嘅 Public Order 已經盪然無存,離回歸到原始嘅弱肉強食世界只係一步之遙。

今日之果係過去七個月種嘅因

廣告

香港到咗今時今日,唔係一朝一夕,我敢斷言,如果武漢肺炎喺 2019 年嘅年頭爆發,香港斷斷唔會淪落到如斯田地。林奠嘅港共政權已經完全失去作為政府嘅一切公信力、人民授權、以至最基本嘅尊重,呢種對政權嘅鄙視係跨界別、跨越黃藍政見。武漢肺炎危機只係一個誘因,主因係呢七個幾月以嚟港共政權夥同警謊將「社會契約」完全撕破:

每一次警謊嘅四點鐘大話會;每一個荒謬之極嘅大話;每一次班林奠出嚟為警暴解說;每一個記者被襲擊;每一宗律政司選擇性檢控;每一次提起 7.21、8.31;每一次諗起陳彥霖、周梓樂;每一宗離奇屍體發現墮樓浮屍無可疑案,都係政府與人民毁約嘅鐵證。人民已經清晰明白到法律已經淪為政權維穩同打壓異己嘅工具,基本法嘅保障已經被肆意扭曲成一堆沒有意義嘅條文,政府既無能亦都無心去保護自己嘅人民。林奠港共政權無下限嘅厚顏無恥將社會嘅道德底線一日一日咁拉低:即使為保衞家園縱火,即使係炸彈襲擊為封關,再違法、再激進嘅做法都相對變得可以理解同體諒。

廣告

早知今日,何必當初

唔駛再問點解醫護會變到咁「無人性」,會拋棄病人選擇罷工、逃離高風險工作,一切都係「因果業報」。仲記唔記得當日理大攻防戰一役,有幾十名義務醫護急救員被雙手反手綁喺地下、被濫捕嘅時候,全世界都為香港警察犯下戰爭罪行而震驚,當中包括不少現時醫管局職員。但係當時上至林奠、陳肇恥;中至醫管局主席范鴻齡、總監高拔陞、鍾健禮,以及咁多位專家教授袁國勇、梁卓偉、沈祖堯;下至每個被捕醫護嘅部門主管、顧問醫生,有無一個為呢班本住人道主義去救人嘅醫護講過半句公道說話?有無人讉責過警暴半句?有無人為人道主義講過半句?

呢班人每一個都喺社會上有權力有地位有話語權嘅「大人」,當日選擇咗愛惜自己嘅羽毛,將自己嘅地位、利益置喺良心、道義同同袍之前,視不公義之事而不見,不作一聲。呢一幕深深烙印咗喺每個香港人心中,亦都烙印咗喺一眾醫護嘅心入面,到今日喺危難之際,你哋仲有何顏面去道德勒索班醫護?指責佢哋係妄顧病人嘅安危福祉?要佢哋甘心為不義政權賣命?

人民係體制內外抗爭今日只係開端

當「社會契約」被暴政撕破,人民就會喺法律嘅內外,體制嘅內外進行全面嘅抗爭同不合作:

  • 當日政府用緊急法無所不用其極咁去打壓人民嘅自由同表達意見嘅權利,所以今日醫護就用基本法賦予人民罷工嘅自由去抗爭;
  • 當日政府利用公務員事務守則,利用「政治中立」去打壓公務員嘅政治權利,今日醫護就用合約賦予嘅「病假」嘅權利去進行不合作運動;
  • 警謊如何堵塞及防礙新聞自由、刻意攻擊記者,今日就有唔同制體內外嘅人士向傳媒「爆料」、「洩密」。

呢個只係開端,緊隨著醫護罷工、口罩缺乏、前線海關、入境人員相繼受感染、消防救護防護不足,當醫護都可以放低道德包袱,打開咗「潘多拉的盒子」,一連串嘅公務員不合作運動將會一浪拉一浪進行。即使喺體制之內,都可以大有作為,例如集體依例請病假、集體按章工作、AO 全體準時收工、放工唔覆任何電郵,平時三十分鐘做嘅嘢慢慢用三個鐘先做完等等……即使無人犯法、無人違規,政府嘅防疫工作根本無法有效推行,甚至整個政府癱瘓。

世上沒有無緣無故的愛,亦都沒有無緣無故的恨,七個月種嘅因,結今日嘅果。香港到咗 2020 年嘅今日,喺林奠港共政權班子治下,已經完全唔能夠管治,每個人民被迫用最原始嘅方法嚟保護自己,對抗暴政,人民嘅反噬宜家先藉住武漢肺炎爆發出嚟,今日只係開端。

發表意見