立場新聞 Stand News

今場選舉我哋需要點樣嘅政治人物?

2020/7/12 — 16:05

立場新聞圖片

立場新聞圖片

【文:港女一言堂】

近日開始講緊初選係一場民意授權,讓當選者更有牙力去打國際線。確實,這目的更貼近極有機會DQ 35+嘅現實,不過由候選人講出嚟,少不免經過包裝,筆者直白啲講,透過政綱、街站同論壇向公眾展示自己,選舉係最快最直接俾政治人物獲得power嘅跳板,從而係任何戰線上有更大嘅發言權。

而對於選民嚟講,係中共明言不允許民主派 35+,加上国安法強勢壓境,議會戰線真係仍有作用?或者我哋都係時候拋棄對議會嘅想像,認清投票充其量只係表態,係一場成本較細嘅點人數遊行。

廣告

係呢個立論基礎下,我哋今次唔係選「議員」/「代議士」,而係授予一個人係公共空間中有更大嘅公權力去發言、即係「光環加身」。候選人嘅立場/派系當然重要,同時亦必須「選賢任能」。之前大部分選舉宣傳放咗係「當選後會點樣係議會抗爭」、「點解要踢走老一派」等等,重心仲放係議會,坦白講,實現嘅可能性接近零,不過係用嚟觀察候選人嘅表達技巧、論述能力同理念立場。

但要承受光環,單單呢幾項能力係絕對唔夠,仲必須有政治視野:一種大格局觀,能審時度勢、舉一反三,大約估算到未來嘅時局發展/社會風向,並且能想像日後建立點樣嘅香港。唔再停留係"What"嘅階段,而係可以闡述到實際嘅"How"。

廣告

即係點?舉例講,唔需要再講咩係攬炒、點解要攬炒,甚至唔係點樣攬炒,而係攬炒完之後點?講真,而家都炒緊啦,係咪要將眼光再放遠啲?至少,筆者會期望有候選人講到以上呢番說話。

尤其係本土派,若果要踢走老屎忽,就更加要帶嚟新政治氣象。

當然,係成本愈嚟愈大嘅情況下,有勇氣企出嚟已經係一種能力。而作為經歷過17、18年低潮期嘅人,或多或少明白大家對羽翼未豐嘅人嘅珍惜,希望呵護佢哋去成長。然而,香港呢一年嘅局勢發展得太快太急,冇充裕嘅時間畀我哋慢慢摸索。即係,係游泳池跟老師學游水,係更培養到佢哋嘅興趣、更想繼續落去,但危急之際,最快係扔佢落大海,透過救生本能去學識,必要時扶佢一把。

而且,講真,本土派係出過傲視政界嘅領袖,大家都唔想16年人材輩出嘅全盛期,已經係「竟花光所有運氣」架?

不過筆者相信大部分候選人都係有能力,只係受制於選舉玩法,思考太多所謂嘅宣傳策略。拋棄以往社運嘅框架啦,更何況,展現到長遠視野、論政能力,加埋出色嘅演講,呢啲政治魅力本身已經係最好嘅宣傳,足以令民眾跟隨。

順帶一提,「如果有一日我唔係做緊自己,推我落嚟!」係政治人物需要嘅自信同氣量,而且更要令民眾真心相信你做得到,支持者亦無謂將所有嘅批評視為「分化」。

最後最後,所以初選仲係有意義,無謂眨低,亦唔需要高估。今個星期六、日,不妨花少少時間去投張票。

(作者簡介:一個普通港女。得閒鍾意講下政治、文學或者電影。)

 

發表意見