立場新聞 Stand News

今日邱騰華嘅「一個中國」原則,就係他日廿三條嘅執法標準

2020/4/3 — 15:43

1. 港台記者喺節目《The Pulse》訪問世衞助理總幹事艾爾沃德,關於問及台灣抗疫成果,世衞會否重新考慮其會員資格一事,引起國際關注,商經局局長邱騰華發出強硬聲明,指港台女記者表現有違「一個中國」原則,廣播處長梁家榮必須問責。

2. 邱騰華作為商經局局長,體制上係香港電台嘅直屬上司,佢嘅強硬聲明有別於一般藍絲 KOL 或者小粉紅嘅抨擊,係官方認證嘅睇法,亦都係一錘定音咁將梁家榮定案。

3. 邱騰華嘅指控,由記者問及台灣嘅世衞資格,推斷出違反「一個中國」原則,再推斷出違反《香港電台約章》,再定下梁家榮必須問責嘅結論,係徹徹底底嘅強盜邏輯,以言入罪嘅文字獄。

廣告

4. 首先,當時港台記者係發問,答問題嘅權利在於世衞助理總幹事,佢大可秉承一貫「中國衞生組織」嘅 line to take,重申台灣係中華人民共和國嘅一部份,世衞係以主權國為會員定義,彰顯「一個中國」原則。但係佢無咁做,反而好肉酸咁迴避問題,以拙劣演技扮聽唔到再 cut 線,更加彰顯咗世衞作為中共傀儡打壓台灣嘅意圖,先引起國際關注,令中共與世衞蒙羞。 

5. 港台記者無可能預期到艾爾沃德會用咁嘅反應嚟回應問題,而追問受訪者正正就係作為記者嘅天職。答問題嘅係世衞、有意行台獨嘅係蔡英文政府、獨立於國際係台灣人民嘅意願,幾時輪到港台記者同梁家榮承擔責任?邱騰華因此而問責於港台記者同廣播處長全不合理,李代桃僵,香港電台節目製作人員工會講得好:「我們已失去發問的自由」。

廣告

6. 如果用同一個邏輯推論,係咪以後記者訪問林奠有關港獨議題就係宣揚港獨?係咪去過台灣採訪民進黨政府嘅人都係違反「一個中國」原則?如果用同一個推論落去,新聞自由將會被全面扼殺,最後所有傳媒只會淪為中共嘅喉舌。 

7. 再者,佢所講「眾所周知」世衞組織成員國均以主權國家為單位並非事實之全部。事實上,世衞嘅 membership 有好幾種,唔係全部都係聯合國承認嘅國家實體,有好多 associate member 同世衞觀察員都唔係一個獨立國家。喺 2009-2016 年,台灣一直都以「世衞觀察員」嘅身份參加大會,而時任嘅總幹事正正係陳馮富珍。敢問邱騰華當年代表中國嘅陳馮富珍係咪公然違反「一個中國」原則?再講,香港同澳門都分別以「中國香港」、「中國澳門」嘅名義作為世衞西太平洋地區 Western Pacific 其中一個獨立地區個體,咁係咪又係港獨、澳獨? 

8. 唔好睇少今次嘅港台風波,以為邱騰華只係想借住呢個訪問去收拾梁家榮同港台,以報警方投訴《頭條新聞》之仇。呢個只係其中一個目的,此例一開,所有 public office 嘅言論空間將會大幅收窄,條不可觸碰嘅「一個中國」紅線將會無限伸延,影響無遠弗屆。

9. 以後 DQ 立法會議員嘅藉口唔駛再捉佢哋有無喺宣誓嘅時候加料,DQ 主任唔駛再搵佢哋有無提倡過港獨言論。根據邱騰華邏輯,只要去過台灣觀察當地總統選舉,參加過任何民間、官方平台演講,與民進黨政府嘅人員有任何來往,甚至用特區護照申請台灣落地簽證,都可以被視為違反「一個中國」原則,並非真誠地擁護中華人民共和國,繼而褫奪任何人嘅選舉權同被選權。

10. 再推延落去,邱騰華今日立下違反「一個中國」原則,會唔會就係他日立廿三條後嘅執法準則?為保障國家安全同統一,當年葉劉交上立法會嘅廿三條草案有條文管制意圖顛覆或分裂國家嘅刊物,無論係發表、售賣、要約售賣、分發、展示、印製、複製、輪入或輸出煽動性刊物即屬犯罪。如果屬實,立廿三條後,梁家榮就唔單只係問責,係要問罪,問分裂國家之罪;港台就係可以被取締嘅意顛分裂國家組織。

11. 今日邱騰華嘅聲明,肆意踐踏新聞自由,無限上綱上線,以一國之名,行文字獄之實,無疑係新一輪嘅文革開端,如果社會各界、新聞媒體今日唔作聲,唇亡齒寒,他日就會失去發聲嘅權利。

發表意見