假才子

假才子

比較政治碩士學歷,現為傳媒工作者。「假才子」是因為現在流行才子才女,但又沒人敢承認自己是假大空才子才女,故先行澄清。文章寫得不好還請見諒,畢竟我不是真才子。

2020/1/7 - 17:04

代表的香港上一代人

又聽到嗰句啦,咩年輕人破壞緊上一代辛苦建立的乜乜乜,今次由劏房波講。每次聽到依句,我都思惑,到底上一代係有咩咁把炮呢?好似從來冇好具體咁解釋過。我今次嘗試拎幾個 case study 嚟驗證吓。

話說以前日本明治維新,對外開國,有位仁兄寫咗本書叫《代表的日本人》(Representative Men of Japan),向西方介紹有咩可以代表到日本民族優秀一面的偉人,唔好睇小我哋云云。所以我就諗,試吓搵幾個《代表的香港上一代人》出嚟,睇吓係咪可以從中吸收上一代有咩民族性咁優秀。

第一個,當然係全香港人之中最位高權重嗰位,特首林鄭月娥(我講明係香港人之中,所以習總同駱總都唔計㗎)。嗱上一代成日講嘅叻嘅定義,包括上位、賺錢、交稅、買樓等等,咁都升到特首之位,仲賺緊五百幾萬一年,應該算具代表性的香港上一代人啦係咪?咁大家最記得佢的林鄭的特點係咩呢?鐘意認叻。成日提小學考第一。成日藐人。擦老細鞋。唔識用八達通。唔識買廁紙。升到上香港的權力巔峰(再強調唔計習總同駱總),最代表到香港上一代的人,係咁嘅人。

廣告

下一位,第二位代表的香港上一代,當然就輪到張建宗啦。佢真係合哂定義㗎,做到政務司,人工四百幾萬,又幾疊樓喺手(根據報道,有九個物業合共值 1.5 億),計埋差餉一年交稅多過唔知幾多香港人成份糧。咁佢又係個點嘅人呢?眾所周知,佢就算大家傳統 stereotype 中的公務員:多做多錯唔做唔錯,講嘢遊花園講咗等於冇講,返工等放工放工等放假,40 年公務員生涯冇一樣政績噏得出嚟。你咪理,佢根據上一代的定義都係好叻好成功。

逆向思維,用返同一個邏輯,我哋又可以話,如果你係個上一代而你人工冇四百幾萬一年,冇九個物業 1.5 億喺手,你就係廢過張建宗,廢過一個多做多錯唔做唔錯,講嘢講咗等於冇講,返工等放工放工等放假,40 年冇一樣政績的公務員。我知道西方學術界鍾意,用某個條件去測試一樣嘢時,會叫依個測試做「XX-test」,所以我會叫依個做「Cheung Kin-chung test」。你身邊有幾多上一代通過到「Cheung Kin-chung test」?

繼續數落去,下一個代表的香港上一代,就輪到劏房波啦。有名你叫劏房波,當然大家最記得佢的強項就係劏房、囤地、酒駕等等啦。但我覺得佢最犀利嗰樣,都係向全校發黑函中傷細路個同學,仲發到去外國大學令人唔收入學。依啲真係賤中之賤,cheap 中之 cheap 啦。代表的香港上一代,劏房波絕對值得。

數完依幾個,當然就要有埋「墊司底」鄭若驊。律政司帶頭犯法,僭建委員會主席搞僭建,跌一跌親請 N 個月假呃人工,跟住老公又玩借殼上市搵人笨隨時比人查。代表的香港上一代,點可以漏咗佢呢。

唔爭在數埋歷代特首啦。梁振英,太多嘢可以講,唔逐樣列出嘥大家同我時間,我都係鍾意當年煙仔何未轉陣營之前嗰句,「你間公司做到零呀(* 戴德梁行財困),將來你點樣管治我哋香港呀?你識唔識管治㗎?」(大意)係囉,結果佢管治成點,大家有眼睇啦。

曾蔭權。有名你叫「貪曾」。講完。

董建華,又係經典,又係「公司做到零」。唔同在,梁振英係由零做起,變返做零,都係打回原型啫,你董建華係將老豆間世界最一線公司做到零呀,勁幾多呀真係。代表的香港上一代,冇你份點得呀。

睇完依個名單,《代表的香港上一代人》呢本書都係唔好出啦,羞家呀。但班上一代仲係成日講佢哋幾成功,真係匪夷所思。

最後補多段。公道啲講,都有上一代開始覺醒,承認上一代其實都冇建立好啲咩,搞到老人家要拾紙皮,中生代做哂樓奴,後生冇未來冇希望,上一代有叻就認,有唔好就賴落下一代,等等。希望越來越多上一代都覺醒。又真係最後最後補多句,啱啱見人講起沙士死去的謝婉雯醫生等人。唔係反串,佢哋我就絕對心服覺得係應該要將事跡傳比下一代的《代表的香港人》。不過如果佢哋活到現在,用返劏房波、收成波等人的標準,都肯定變成廢青同失敗者,你話會唔會吖嗱?

 

作者 Medium