立場新聞 Stand News

以香港作為信仰

2020/11/3 — 18:24

作者製圖

作者製圖

【文:Gear 噏】

國安法後抗爭進入休整期,抗爭陣營充斥住無力感,出現好多內部矛盾同互相指責。民主派初選時張可森提出「香港作為信仰」,雖然信仰對香港人嚟講好陌生,但共同嘅信仰正正係我哋呢一刻最需要嘅嘢。

信仰戰勝極權

廣告

擁有信仰唔代表係信奉某種宗教或神明,宗教只係其中一個表現信仰嘅方式。信仰係我哋生而為人,選擇相信嘅價值觀、生活方式同人生意義。喺極權統治下,人民失去集會自由同表態嘅空間,難以透過參與群眾運動團結起來,個體都變得非常脆弱。縱觀歷史長河,好多經歷過極權統治嘅民族都有宗教信仰,幫助佢哋喺苦難中維繫群眾。猶太人散落世界各地,因為猶太教義而決心復國;波蘭人以天主教作為後盾,喺共產統治下保存到文化同傳統;藏人信奉藏傳佛教,不怕犧牲同中共戰鬥到底。極權冇辦法奪去人民內心嘅信仰,信仰係人民對抗極權嘅希望。

為信仰而抗爭

廣告

當街頭抗爭稍為靜止,有人會因表面抗爭人數嘅多寡而灰心喪志,用冷嘲熱諷嘅方式指責其他人付出唔夠多,有從眾同比較心態。信仰係每個人內在嘅信念,唔會輕易受外在因素影響。當抗爭唔再有好多畫面同關注,就係真正考驗信仰嘅時候。我哋好少見基督徒會因信徒嘅多少而自怨自艾,甚至放棄信仰。哪怕世上只剩下一個信徒,佢哋仍然視傳福音為使命。當你選擇咗以抗爭為使命,就唔需要太在意民智嘅高低、比較大家付出嘅多少。抗爭唔係因為香港人值得與否,而係要對得住自己嘅身份。堅持唔係因為從眾,而係為咗自己心中嘅信仰。

相信香港呢片土地

面對極權,有人選擇移民,並經常引用猶太人做例子,表示離開唔代表放棄抗爭。猶太人作為離散民族,飄泊流亡過千年,終能復國,係因為有共同信仰去維繫自身共同體。佢哋堅信猶太教義中復國嘅預言,就算散落各地都仍然心繫以色列本土。以香港作為信仰,「煲底之約」就係香港人信仰嘅預言。世上只有一個煲底,無論係流亡海外定係身陷囹圄,我哋都期待煲底下除罩相擁嘅一日。移民只係手段,我哋目標係喺香港呢片土地上實現民主自由,而唔係移民到外國享受自由嘅果實。維繫香港人嘅係紮根本土嘅信仰,就算被迫要逃離家園,我哋都要相信香港呢片土地係唯一安身立命之所,係信仰嘅應許之地,別無他處。

相信每一個香港人

有人擔心香港人會放棄抗爭,背棄曾經相信嘅價值。信仰會透過個人經歷去確認同加強。有人覺得雨傘後唔再有大型抗爭,結果五年後香港人成就咗一場波瀾壯闊嘅革命。信仰嘅種子早已透過共同經歷栽種喺我哋心中,並會喺實踐中萌芽成長。以香港作為信仰,要相信香港人呢個共同體。過去一年嘅抗爭就係信仰嘅見證,我哋親眼見證過香港人嘅勇敢、智慧同團結。我哋已經成為咗香港嘅信徒,一息尚存,抗爭到底。

相信香港終會重光

有人話好攰、唔知幾時先贏。缺乏信仰嘅人容易迷失,因為太過著眼於最後嘅成敗得失。信仰係就算睇唔到結果都會繼續相信。擁有信仰嘅基督徒好少質疑耶穌幾時再臨,因為耶穌定必再臨,信徒應該著眼於實踐信仰嘅過程,去努力傳福音。以香港作為信仰,我哋要堅信香港終會重光。如果連香港人自己都唔相信會贏,試問呢個夢想又點會實現呢?喺黎明來到之前,作為香港人要莊敬自強,喺抗爭同日常生活中實踐信仰。哪怕再漫長嘅黑暗,每個實踐信仰嘅香港人都會成為一點燭光,照亮身邊孤單困倦嘅手足,迎來重獲新生嘅香港。

用一生證明香港嘅存在

香港人冇一個宗教信仰可以依靠,或者你對香港未來充滿疑惑同困倦,但請你相信香港,相信我哋係香港人。將過去一年共同經歷嘅苦難、手足之情同願景,視為一種信仰。我哋係為咗自己信仰而選擇抗爭、堅持同犧牲。

巴勒斯坦裔學者 Edward Said 講過巴勒斯坦人嘅命運,係要用一生證明巴勒斯坦嘅存在。作為香港嘅信徒,就係要用一生證明香港嘅存在。只要我哋仍然相信香港,香港就會存在。

在晚星墜落徬徨午夜,願各位堅守作為香港人嘅信仰,煲底見。

 

作者自我簡介:本土派青年,希望宣揚本土論述。

作者 Facebook

發表意見