立場新聞 Stand News

以「法」治港的陽謀

2020/6/2 — 19:18

林鄭月娥

林鄭月娥

1. 祿泉樓嘅社區感染係喺有限聚令嘅情況之下爆發,換句話講,「限聚令」以及港府目前嘅政策並不能夠有效防止社區爆發嘅發生,但係今日就用呢個理由延長限聚令,目的昭然若揭。

2. 再次延長嘅限聚令將會覆蓋去年嘅「抗爭」週年紀念日,6.9、6.12、6.16, 全部日子都會以「公眾健康」為由,否決所有嘅集會、遊行申請,以公眾健康 public health 之名,行公眾安全 public order(ordre public)之實。

3. 期間警方絕不會發出「不反對通知書」,以致所有聚集都會係「非法集結」,大大增加抗爭者嘅成本,減少行出嚟表達意見嘅市民。

廣告

4. 呢段時期入面唔會再容許喺街頭展現對「國安法」嘅不滿,唔再容許民意以和平遊行嘅方式展露喺世界;反對派再不可能透過接二連三嘅示威,滾雪球式咁凝聚民意,為九月立法會選舉造勢,以致重蹈去年區議會嘅覆轍。

5. 同時就繼續用啲假簽名同全世界人講「國安法」擁有堅實嘅民意基礎,製造輿論配合人大常委會立法。

廣告

6. 會唔會再延長「限聚令」?講到明條附屬法例會延長到 8.31,就知呢個永遠都係選項之一。係咪真係延長就要視乎人大常委會會唔會喺六月尾就立「港版國安法」。立咗之後,國安法就可以取代「限聚令」,用「國家安全 national security」呢個更宏大嘅理由去打壓人民。

7. 如果真係立法,「7.1 大遊行」就會係「新版國安法」嘅試刀石,遊行中若果有「舉美國國旗」、高呼「林鄭下台」、「結束一黨專政」、「香港獨立、唯一出路」等口號出現,對於呢啲行為會唔會執法?相應嘅執法標準係點?將會係殺雞儆猴嘅第一擊。

8. 中共港共都已經撕破咗臉,點解仲要做呢啲門面功夫?因為佢哋對住尚未表達立場嘅歐盟等國際社會仲要做一場戲,要有個說法去打壓香港人嘅人權自由,就係「依法」治國治港。

9. 根據受《基本法》賦予憲制地位嘅《香港人權法案》第十七條關於「和平集會的權利」

「和平集會之權利,應予確認。除依法律之規定,且為民主社會維護國家安全或公共安寧、公共秩序、維持公共衞生或風化、或保障他人權利自由所必要者外,不得限制此種權利之行使。」

10. 換句話講,「國家安全」、「公共秩序」、「公共衞生」、「風化」、「保障他人權利自由」係僅有可以「合法」限制人權自由嘅合法理由 legitamate aims,呢啲藉口就係一旦被司法覆核挑戰,給予法庭判決嘅「保險線」。

11. 法律永遠都係中共操控人民嘅工具,從來唔係用嚟限制政府權力同人民權利嘅保障,呢啲就係佢哋口中嘅「法治」,同西方民主自由嘅概念完全南轅北轍。

12. 中共港共嘅策略就係將所有示威扼殺係萌芽嘅階段,對於民意、民怨仍然採取「圍堵」而唔係「疏導」嘅政策。同時,林鄭同你講,香港人嘅言論自由、集會自由一啲都無受損。

13. 中共同林鄭嘅如意數盤會唔會打得響?香港人經過咗呢一年嘅掙扎,仲會唔會用同一樣嘅反應嚟對待打壓?抗爭嘅模式會唔會改變?喺民意被圍堵,喺「國安法」嘅威脅之下,會變得溫馴定係會有魚死網破嘅覺悟?拭目以待。

發表意見