立場新聞 Stand News

作為 9upper 的張建宗司長

2020/8/22 — 20:59

圖片素材來源:《少林足球》電影截圖

圖片素材來源:《少林足球》電影截圖

有中大畢業生向張建宗吐苦水,哀嘆求職難。張司長以長輩口吻,勸年輕人勿「揀擇」,要做好期望管理,洗碗也是工作經驗。寥寥幾句,就盡顯司長作為一個 9upper 的功架。離地唔在講,仲以不合比例的無知扮演人生教練,呢下真係臉皮薄啲都做唔來。要委屈司長打份政府工,唔辭職去街頭賣藝,表演柒到盡頭便是型,實在是 9up 界的重大損失。

作為 9upper,司長唔知世界艱難,實在就好似司長唔需要花太多時間理髮一樣,係好平常的事。無數中小企僱主已山窮水盡,唔好話請人,下個月執唔執都唔知,年輕人肯免費幫手打工,佢都無嘢畀妳 / 你撈。除非,司長講嘅係嗰啲大商家,經濟點差都好,左手炒人,右手拎政府資助,大業主仲可以安坐釣魚船,毋須因疫情而減租,榨乾租戶最後一滴積蓄,並趁市道欠佳執平貨。呢啲咁成功嘅僱主,香港有幾多,請得幾多人?一個大學畢業生要洗幾多年碗,至儲到足夠的工作經驗,打動到呢啲食慣大茶飯的老細?

作為 9upper,一早假定年輕人唔捱得,諸多揀擇,嫌三嫌四,亦係好合理。公務員系統有十幾萬人,居然無人寫報告話畀班高官知,香港人晏晝搵飯食好艱難,咁阿司長沿用彈咗幾十年嘅老調,但凡年輕人有不滿,梗係年輕人嘅錯,又實在例牌得令所有老 seafood 一起感動的。我食鹽多過你食米嘛,鬼叫妳 / 你遲出世幾十年呀!

廣告

作為 9upper,又總會圍爐搵到一些知音,證明家陣嘅年輕人貪威識食、短視、坐唔定(下刪一千字)。我們不能完全否認年輕人有這些問題,但請留意,香港政府高層不是 9upper 聯盟。香港搞成咁,佢地和既得利益階層要負上最大責任。以香港的富裕,但留給年輕人希望的機會少到如此可憐,所謂的成功人士或上了岸的老 seafood,你地未答到點解會搞成咁之前,係無資格數落年輕人的不是的。

 

廣告

作者 Facebook

發表意見