立場新聞 Stand News

你班保皇狗贊成到夠 — 反對 1,375 億防疫基金撥款講稿

2020/4/18 — 9:39

事先聲明
對於這個 1,375 億防疫基金撥款
我一定投反對票

反對的理由分兩個層次

第一個係比較表面的層次
市民睇唔到政府分配咁大筆資源﹝千幾億﹞時
有抱住一種救急同救弱為先的原則

廣告

好聽啲講
政府就像莫乃光議員所說
淨係用自己方便的機制和手法分錢
實際上,他們是用功能組別「政治分贓」的原則分錢
邊度對中共有大啲政治需要
或者邊班人在中共權力圈中政治實力大啲
邊度咪多啲錢

如果唔係
你解釋唔到點解同樣係張建宗所講的「心意」
開餐廳有 20 萬
開零售店有 8 萬
補習社就得 4 萬
自僱體育教練就得一炮過 7,500 元
飲食業和零售業的錢又快又多
係因為中共知道兩個界別最有可能被民主派挑戰成功
咪要盡快收買人心
教育界功能組別中共有排都贏唔到
補習老師又冇票,錢咪少啲
體育界、文化界嗰班導師,都係冇票,7,500 元咪打發走囉

廣告

仲有
早兩日,居然有自僱保險業前線搵我開記招
申訴佢地就算有供強積金,都係得一炮過 7,500 元資助
反觀自僱的士和小巴司機,以及自僱導遊
又可以例外地有每月 5,000 至 6,000 元津貼,一共收6個月
張建宗今朝話
係每一個局負責諗自己範疇的業界援助計劃
但我唔相信係因為財經局局長劉怡翔特別廢
所以先遺漏了自僱保險經紀
最容易解釋的理由係因為自僱保險經紀响保險業界冇票
陳健波根本唔需要放佢地在眼內

至於 800 億「保就業僱員薪金資助」點解係將錢俾僱主唔直接俾僱員?
點解唔做失業救濟金?
全民派一萬點解唔可以即批即派?
張建宗解釋話因為技術問題快唔到、做唔切
香港人相信嗎?
大家都見識過呢個傀儡政府
响執行北京政治任務時嗰種快狠準
梁頌恆和游蕙禎由宣誓到人大釋法到法庭宣判取消資格
前後只係一個月
人人一萬要半年先派到?咪玩啦

第二個反對理由比較根本

香港人同埋民主派都要認清依家的政治危局
當特區傀儡政府一邊扮晒體恤民情搞抗疫基金時
另一邊廂中聯辦主任駱惠寧正在急推23條國家安全立法
全國港澳研究會副會長劉兆佳之後執口水尾說:
「如香港短期內不能完善原有法律機制,中央一定會出手,修改《基本法》、人大釋法、將全國性法律引入香港。」

响23條隨時由北京直接宣布生效
做反對派唔聽共產黨指揮隨時被控「公職人員行為失當」
半民選立法會分分鐘被解散的今日
我想我們唔使再繼續一套和和氣氣俾意見的反對派政治
繼續幫你個政治分贓抗疫基金補漏拾遺

要支持,你們班保皇黨支持到夠

講完

發表意見