立場新聞 Stand News

你,最近還好嘛?

2020/2/22 — 19:45

作者製圖

作者製圖

我過得唔好呀,雖然應該冇中肺炎,但或者已經患上創傷後壓力症候群同抑鬱症。

你呢?大扺都不太好吧?

喺我地呢一個家中,響過了三萬發槍聲,而我地亦有超過七千位屋企人被捕,未來數年隨時只能喺一扇鐵窗內過活。每想到如此種種,「快樂」兩字就離我們走遠了。黑警每一發子彈每一棍,都喺大家心中留下難以磨滅既傷疤,也許比皮開血綻的痛更恆久。

廣告

而喺最辛苦嘅時候,又會諗:「其實我憑咩講辛苦呢?比起___,我所付出嘅,根本微不足道。」求助的話,說到嘴邊又吞下了。原來每晚夜裏與心魔糾纏,竟比催淚水炮更為難熬。尋尋找找,為何都找不到的,係重拾原有生活的動力,結果每一日都只能盡一切嘅氣力,去再活過呢一日,承著肩上嘅重擔匍匐前行。

突然扎醒然後瞓唔到覺攤喺張床眼光光望天光、無論幾努力都推動唔到自己離開張床、平時最鍾意嘅興趣都提不起勁再做、望住朋友一個個 msg 搵自己連打開嘅氣力都冇、日日都覺得自己好對唔住__、望住新聞黑警又拉人啦我咩都做唔到好冇用、點解身邊啲港豬乜事都冇咁自己就日日咁辛苦、然後喺朋友面前笑面迎人把悲傷留給自己廢事又放負……唔知你有冇經歷過呢一切,反正我就有了。

廣告

開口講自己嘅感覺,總會擔心旁人覺得自己「又叫春」、「attention seeking」、「矯情 L」、「做乜啫佢」。點解我又要寫呢一切?最矯情最老套的一句要來了:

我真係好想你地每一位手足知道,我們都是這樣走著的。

自太古廣場那一日起,我地就開始永遠失去一些戰友、朋友、家人。我地受嘅傷已經太多太多,我地唔需要、亦唔可以再失去更多。我今日喺度同呢個 page 近萬位 followers 打開心扉,講我真係好辛苦,就係想比你地知道,如果你地任何一位任何時候感到累了,只要你一句說話,我地總會係度陪你一齊渡過。齊上齊落,說好的。


點解會突然寫呢啲,其中一個原因係見到有朋友分享以下工具(見呢個 post 最底),透過簡單問卷問題,去幫你了解一下自己嘅精神健康狀況。解決問題嘅第一步,就係要知道問題嘅存在嘛~

好似我咁,抑鬱症狀嚟講 21-42 分算嚴重,我有 34 分;創傷後遺症狀嚟講 6-10 分算嚴重,我有 9 分。生於咁嘅亂世,唔開心真係好正常,希望你地都可以同我一齊,好好了解自己嘅精神健康,勇於面對問題,唔好怕同身邊嘅人講、互相支持,先可以繼續更堅強咁走下去。我地仲要煲底見㗎嘛~

從來沒人教我,如何去治療一個城巿嘅痛哀,但我地總可以一齊去試,由自己、由身邊嘅朋友開始。

We need to build a supportive, non-judgemental culture, where there is no more stigmatization towards mental illnesses. We need to care for all those who are with us, and no less importantly, for ourselves.

"I am not okay, and I don’t feel any shame for it."

最後想邀請大家,如果心入面有任何嘢想同人講但無處抒發嘅話,可以隨便喺呢個 post 下面 comment 同大家分享。我未必有行動力去覆哂呢個 page 嘅 comment,但至少我一定會睇哂你地所講嘅說話,而我都一定會一直同你地每位手足一齊互相撐住走落去。


「願你記得軟弱沒有錯,痛亦沒有錯。」
「如此際想變更強嗎,請你允許你,真心痛過。」

(《強弱》,詞:藍奕邦)

香港大學醫學院精神醫學系的 ymh 青年精神健康小組,研發了「心之流」HK FLOW Tool 嘅不記名工具,助你覺察自己的情緒及精神狀態,分析自己抑鬱情況、創傷後遺的嚴重程度,並給予一些建議。問卷不短的,學術的東西,努力用上口語,又配上含蓄的畫,很有心,很值得用 10 分鐘做一做。

今年一月,港大醫學院公共衛生學院公布最新研究,發現去年社會動盪期間每 5 名成人就有 1 人患上疑似抑鬱症或懷疑創傷後壓力症(PTSD),情況跟經歷大型災難、武裝衝突或恐襲的地區相似。

但受困擾的香港人誰敢去公立醫院求助?誰又能付上昂貴的醫療費用?本應由政府承擔的精神健康服務,今天都由許多自發的公民組織承擔起來。

上星期,T2T 曾跟這些自發的公民組織傾談,他們都分享,日間工作,工餘輔導,團隊中都多多少少都有點 burnt out。面對許多需要,我們不能全然依賴專業人士,這是另一種自我削權。當然 1/5 嚴重的需要尋求專業輔導,另外的 4/5 可以學習照顧自己及他人,collective resillence 或說集體情緒支援的力量,是我們很想建立的。

學懂照顧情緒第一步,或許就是覺察自己情緒及精神狀態。試用他們的工具了解一下自己,特別在 21 號如此 emotional 的日子。

注意:如 ymh 所言,呢個分析工具主要用作增加大家對創傷、心理困擾等的意識,懂得求助,不能代替專業診斷同治療。另外,插畫雖由含蓄所畫,但不是 T2T 的作品,我們轉發而已。

 

作者 Facebook

發表意見